Paw ka kyrteng u nongïalam ka GSU ha ka FIR halor ka jingkynnoh ba thmu pynïap briew ha SGH

Williamnagar, Ïaïong 24: Kawei ka case jong ka jingshah kynnoh thombor bad pyrshang ruh ban pynïap briew ka la paw pyrthei ha South Garo Hills, ha kaba uwei u nongshong shnong u la kynnoh ba uwei u nongialam ki samla pule u la leh ïa ka kam thombor kaba shyrkhei bad kaba la da thmu lypa.
U Francis S. Marak u ba shong basah ha Jadi uba hap hapoh ka jingpeit jong ki pulit ka Nongalbibra Police Station u la ujor da ka First Information Report (FIR) ha Jadi Police Outpost pyrshah ia u Raindon M. Sangma na Rongsa Awoe. Ha ka jingujor jong u, u Marak u la kynnoh ba u la shah thombor ha ka miet jong ka 23 tarik Iaiong ha ka por kumba 9:40 PM katba u dang wan phai na Gasuapara.
Katkum ka FIR, katei ka jingjia ka la jia ha Dangsa Awoe, ha kaba la kynnoh ba u nongshah kynnoh u la khanglad ia u Marak bad bthah ia u ban pynsangeh ia ka kali jong u. Hadien ba u la kohnguh, u Marak u la kam ba u la shah thombor kynsan bad leh donbor khlem daw.U la kynnoh ba u nongshah kynnoh u la pyndonkam da u knuckle guard bad kiwei kiwei ki tiar ban pynmynsaw, da kaba batai ba katei ka jingshah thombor ka long kaba la thmu bad kaba buh jingma ia ka jingim jong u.
Shuh shuh u Marak u la pynpaw ba ka jinglong jong ka jingshah thombor, kynthup ïa ka jingpyndonkam ïa ki tiar bad ka jingmynsaw, ka pyni ba la thmu lypa ïa ka jingpyrshang ban pynïap ïa u. Mynta u dang don ha ka jingshah sumar.
Ha kane ka jingujor la pyntip ruh ba une u nongshah kynnoh u bat kum u Vice President jong ka Garo Students’ Union (GSU), Nongalbibra Regional Unit (Southern Zone).U Marak u la pynpaw ïa ka jingtieng ba kat ka kyrdan jong u nongshah kynnoh u lah ban pyndonkam ban pynkhih ne khanglad ïa ka jingïaid jong ka jingtohkit.
Nalor kata, ha katei ka FIR la don ruh ki jingkynnoh ba une u nongshah kynnoh u la ju leh mynshwa ïa ki kam dawa pisa na ki nongkhaii trai ri, ki nongkhaïi dewïong bad ki nongshong dukan ha Nongalbibra bad ha Jadi.U nongujor u la kyntu ïa ki bor ba dei peit ban bishar bniah ïa kine ki jingkynnoh ha ka por ba pynlong ïa ka jingtohkit.
U Marak u la kwah ban register ïa kane ka case katkum ki kyndon ba ïadei jong ka Bharatiya Nyaya Sanhita (BNS), ba kynthup ruh ïa ki jingshah kynnoh kiba ïadei bad ka jingthmu ban pynïap briew, ka jingshah thombor bad ka jingpyntieng pynsmiej.U la kyrpad ruh ban pynsted ia ki pulit, da kaba kdew ia ka jingsngewkhia na ka bynta ka jingshngain shimet jong u.
ïa ki kopi jong katei ka FIR la phah sha u Superintendent of Police, South Garo Hills, kumjuh ruh sha ki nongialam jong ka Garo Students’ Union bad sha ki lad pathai khubor.