Na Khundom ka lynti Shillong – Mawkyrwat kem ki pulit ïa ki ar ngut ki nongkhaïi drok

Mawkyrwat, Ïaïong 24: Ki pulit ki la ïathuh ba ha ka 23 tarik u Ïaïong, 2026 ha ka por 10:54 mynstep, hadien ba ki Pulit ki ïoh jingtip ba don ki nongdie drok kiba wan na Shillong sha Mawkyrwat, ki Pulit hapoh jingïalam u Insp. P.T. Lakiang, SI R. Lyngdoh bad ka kynhun jong ki, ki la pynlong ka jingkhynra ha shnong Khundom, Lawblei.
Katkum ka kyrwoh khubor ba la phah da u Bah B. Jyrwa, MPS, Superintendent of Police ka South West Khasi Hills District u la ïathuh ba ha kane ka jingkhynra, la kem ïa ar ngut ki briew, uwei u dei u Bah Khrawbok Mawlein ba dei na ka shnong Jakrem bad u Bah Angelbert Ryntathiang, 26 snem, u ba dei na ka shnong Photjaud Rangthong. Na u Angelbert la ïoh kurup 0.66 gram u heroin.
La kurup ruh ïa ki kali, mobile phone bad kiwei pat ki tiar kiba lah ban long sakhi. La leit rah ïa kine ar ngut sha Mawkyrwat Police Station ban leh shuh shuh ïa ka jingtohkit kiba donkam katkum ka aiñ.
Namar kata na ka liang ki bor Pulit jong ka South West Khasi Hills District ki dang ïai trei shitom ban ïaleh pyrshah ïa u drok bad ban pynlong ïa ka imlang sahlang kaba khuid bad lait na u drok.