Shillong, Naitung 15 : Ka Early Childhood Development Mission jongka sorkar Meghalaya Democratic Alliance (MDA) ka lah ban long ka model ne ka nuksa ïa kiwei ki jylla, ïa ka sorkar pdeng bad wat ha shityllup ka pyrthei ruh, ong u Dr Jack Shonkoff uba dei u Director jongka Center on Developing Child ha Harvard University . Namar kane ka Mission jongka Meghalaya kan rah ïa ka nam ka burom jongka jylla namar khlem pep kiwei ki jylla kin sa bud nuksa beit ïa kane ka mission.
ïa kane u la kynthoh hakhmat ka Meghalaya State Capability Forum kaba dei ka jingïalang ba la ïadon lang da ki proh jabieng ki nongthaw polisi ki nongwad bniah kumno ba ka jylla kan sdang naduh dang rit ban rat dyngkong ïa ka jingduk bad jingkyrduh. ïa kane ka jingïalang la pynïaid da u Myntri Rangbah ka jylla u Conrad K Sangma bad la ïadon lang u Dr Vinod K Paul u doktor ban sumar ïaki khynnah bad uba dei ruh u dkhot jongka NITI Aayog kum u symbud kongsan.
Ha kane ka jingïalang la batai sani bha shaphang kane ka missoin ba la sdang nyngkong da ka jylla Meghalaya hapoh ka jingïalam jong u Conrad K Sangma. Kane ka mission kan ïarap kumno ban wanrah ka jingkoit jingkhiah ïa ki khyllung khynnah bad ïa ki kmie ki kpa jongki da kaba ai ïa ki jingbam kiba tei ïa ki khynnah ba kin san ym tang ha ka met ka phad hynrei ha ka jingmut jingpyrkhat jongki ruh. Kane ka mission kan sdang ban treikam bad sam ïaki jingbam ruh sha ki 1500 tylli ki shnong kiba ym shym la hap hapoh ka jingpeit jongka Integrated Childhood Development Scheme (ICDS) jongka sorkar pdeng. Kumba 50, 000 ki khyllung khynnah bad 10,000 ngut ki kmie ki kpa ki la ïoh jingïarap da ki jingbam kiba tei lyngba ki Self Help Group.
U Dr Jack Shonkoff uba dei u nongkren uba kongsan ha kane ka sngi uba tih bniah halor ki khynnah rit. U la kren ruh ïa ka jingdonkam ban pynsan ïa ki khyllung naduh ba ki dang rit khnang ba kin proh jabieng ruh. U la batai bad pyni ruh kumno ba ka jingban khia ha ka jingmut jingpyrkhat ka ktah ïa ka bor jabieng ruh jongki khynnah. Kumta u la ong ba ka long kaba kongsan bha ban don ka jingïadei kaba hajan hapdeng kiba la san bad kiba dang rit namar ki sngew shngaiñ bad sngew ïoh mynsiem.
Na ka liang u Myntri Rangbah ka jylla u Conrad K Sangma u la ong ka long kaba shisha ba ka jylla ka dang duna bha ha kiba bun ki liang ne ka Sustainable Development Goals (SDG) hynrei u la kut jingmut ba ka jylla ha kawei ka sngi kan sa long hakhmat duh ha ka ri ha kaba ïadei bad ka jingsumar sukher ïa ki khyllung khynnah bad ïa ki briew hi baroh.U la ïathuh ba ka rai ban sdang ïa kane ka ECD Mission ka long hadien ba ula bishar bad ïohi ba ka jylla ka duna bha kiba wan shakhmat ha ki ekesamin Class X bad ka daw ka long bym biang ka rukom sumar bad pynheh pynsan ïaki khynnah naduh ba ki dang rit kaba ktah wat ïa ka bor jingmut jingpyrkhat bad bor jabieng jongki ruh. U la ong ba ka jylla Meghalaya ka long ka jylla kaba kham pher ha kaba ka imlang ka sahlang ka ïashim bynta lang baroh. Wat ha ka khlam COVID-19 ruh dei ki shnong ki thaw bad ki seng bapher bapher kiba ïatreilang bad ka sorkar. U la ong “ Hooid nga mynjur ïa kaei kaba u Dr Jack u la ong ba ngin ym ïoh result tang ha ka shisngi hynrei ngi donkam ban dang ïai bteng ban trei wat ban thaw la ki jong ki polisi treikam ruh.
Kiwei kiwei kiba la ai jingkren ki long u Dr Vinod K Paul, ka Chief Secretary ka jylla kong R.V Suciang, Sampath Kumar bad ki DC na ki district bapher bapher kiba la ïadon lang. Baroh ki la sngew kmen halor kane ka ECD Mission bad ki kwah ban trei shitrhem ba kan long ka nuksa ne model ym tang ha ka ri hynrei hakhmat ka pyrthei hi.
