Sah thylli ki kam ba lait ha SAD bad don ruh ka jingthungkam ba leh shiliang: KHNAM

Shillong, ïaïong 23: Ka Khun Hynñiewtrep National Awakening Movement (KHNAM) ha ka jingleit ïa kynduh ia u Chief Secretary ka jylla u Dr. Shakil P. Ahammed, (IAS), ka la pynpaw ïa ka jingsngewkhia ban ïohi ba lyngba ka RTI ba ka don ka jingïashah shilliang ne noh shiliang haba ïadei bad ka jingthung ïa ki kam bylla sngi da ka Secretariat Administrative Department (SAD (Nazarat) bad kumjuh ruh ka jinglait thylli jong kiba bun ki kam kiba khlem pat pyndap, nangta ruh ka jingwengkam bad ka jingthungkam ruh ka bym ïaid beit ïaid ryntih.
U Working President ka KHNAM Sengkmie u Bah Thomas Passah hadien ka jingïakynduh ïa u Chief Secretary u la ïathuh ba ka party halor katei ka jingeh, ka la pan da kiba bun ki RTI na ka Secretariat Administrative Department ha ki khyndiat bnai ba la dep. Hadien ba la ïoh ka jubab bad hadien ba la khmih bniah bad pynshisha bha, ka la lap ba ki la don ki kam kiba lait thylli naduh u snem 2025, kumta la kyrpad bad kyntu ïa u Chief Secretary ban khmih bniah bad na ka liang jong u, ruh u la kular ban shimkhia ïa kane ka mat.
“Lyngba ka SAN.58/2020/Vol.I/143 tarik 20 Naiwieng 2025 ki don ki kam kiba lait ha ka SAD(N): bad kita ki long peon 81 tylli, Chowkidar 2 tylli, Mali 2 tylli, Cleaner 17 tylli bad Sweeper 5 tylli. Nangta katkum ka SAE.146/2012/Pt/426 ka tarik 26 u Naiwieng 2025 la pyni ïa ki kam kiba lait hapoh ka SAD(E), kita ki long LDA 137 tylli, Typist 128 tylli, Stenographer Grade II 32 tylli, Stenographer Grade III 17 tylli bad Driver 11 tylli,” ïathuh u Bah Passah.
U la ïathuh ba ka SAD(Accounts) lyngba ka shithi No. SAA.24/2025/198 kaba 17 tarik Naiwieng 2025 ka la pyni ruh ïa ka jingdon ki nongtrei daily wage na ka bynta u bnai Ïaïong 2023 haduh u Nailur 2025. “Haba ngi ïanujor bad ka thup ki nongtrei daily wage ne nongbylla sngi ba la ïohpdiang na Under Secretary ka sorkar Meghalaya lyngba ka shithi No. SAN.62/2014/Pt./218 kaba 2 tarik u Rymphang 2026 na ka bynta kajuh ka por, ngi la shem ba ki jingdon ki nongtrei ki la kylla. Nangta ka shithi No. SAN.62/2014/Pt./218 ka 2 tarik u Rymphang 2026 la pyntip ba ka SAD(N) ka pyndon bynta bad ki nongtrei casual kum ki daily wage manla u bnai bad ka jingdon kine ki nongtrei casual ki ïapher na ka 139 tylli sha ka 121 tylli.
“Hadien ba la pynshisha bha ïa ka thup ki nongtrei casual ba la ai sha ngi la ïohi ba kam da don than ka jingpynkylla ïa ki kyrteng ki nongtrei na ka bynta manla u bnai tat haduh u Naiwieng 2025. Ha kawei ka liang, ka long kaba phylla ban ïohi ba la jan 10 ngut ki nongtrei, kiba ki kyrteng ki la paw manla u bnai haduh u Naiwieng 2025 ki la jah noh na ka thup. Ngi la ïohi ba ki kyrteng jong ki nongtrei, kaba ki kyrteng jong ki la kdew ha manla u bnai khlem da don ka jingsangeh, ym kum kiwei pat, bad ïa ngi la pyntip ba ki dei ki bahaïing jong ki ophisar jong ka tnat ne ki riew shimet ba la thung da ki ophisar jong ka tnat,” ong ka KHNAM.
Ka la ong ruh ba ki don ki nongtrei casual kiba la trei palat ki 10 snem kum ki nongtrei casual hynrei ki khlem ïoh ïa ka kyrdan RCW status kumba la buh hapoh ka Regular Casual Worker Scheme 1996, ha kawei pat ka liang ki la shah beh kam pynban.
“Ngi la ïoh jingtip ruh ba ki don ki por ba ka tnat ka pynsangeh ïa ka kam jong ki nongtrei kiba la shah jied hynrei ki la shah khot biang hadien shibnai ne ar bnai. Ha kawei pat ka liang, hadien u Naiwieng 2025 ngi la khmih ba ki don ki nongtrei kiba khlem shah khot biang, hynrei la thung ne bujli pat da ki nongtrei kiba thymmai ha ka jaka jong ki, ha kaba kane ka long ka jingleh bym hok ïa ki nongtrei casual kiba la rim. Ki kyrteng jong ki 10 ngut ki nongtrei kumba la kdew hapdeng Sl. No. 1 haduh 20 ha baroh ki office order na ka bynta ki bnai ba la dep haduh u Naiwieng 2025, kaba mut ba ki dei ki senior casual employee haba phai sha ki snem ba ki la shakri,” ïathuh u President ka KHNAM.
Halor kitei baroh ki jingshem ka KHNAM haba phai sha ka jingkyrduhkam kaba la kiew bha jong ki samla, ka kyntu ïa u Chief Secretary ban pyndap noh kloi ïa kitei ki kam kiba lait.
“Kaba kongsan ka long ba kito ki senior bad ki nongtrei ba la rim kiba khlem shah khot biang hadien u Naiwieng 2025 dei ban khot biang naba ki dei kiba kamai jakpoh na ka bynta ka ïing ka sem jong ki. Ka donkam ban pynduhjait ka jingshah liang haba thung ïa kine ki kam kiba lait, ka long kaba sngewsih ban ïoh ba ki NOK bad ki briew kiba jan bad ki ophisar ki ïoh ki kam bad kiwei pat ki shah kyntait,” u la bynrap.
Ha kaba ïadei pat ba ka jingthung ïa ki kam Peon, ka KHNAM ka pynpaw ba ka ïohi ba ka don ka rukom treikam kaba noh shiliang haba phai sha ki bynta kumba la pynmih ha ki jingpynbna bapher bapher haba ïadei bad ki kam kiba thylli.
“Ngi la ïohi ruh ba da ki spah tylli ki jingthung kam Daily wage da ka SAD la leh khlem kano kano ka advertisement ne ki screening hynrei la thung da ka mon jong Nazir. Kumta ngi kyrpad ba kito kiba la shah thung hadien ba la pyndep ïa ki kam ne jingthungkam ha ka snem 2013 dei ban pynskhem hadien ba ki la trei palat 13 snem,” ong u Bah Thomas Passah Working President
Khun Hynñiewtrep National Awakening Movement Central Executive Committee.