Shillong, Ïaiong 23 : U Nongïalam ka BJP ba dei ruh u MLA ka Pynthorumkhrah, Bah AL Hek ha ka sngi Palei u la ong ba ka party ka dang plie beit ka jingkhang na ka bynta u Myntri Rangbah barim ka Jylla ba dei ruh u MLA ka TMC, u Dr. Mukul Sangma ba un wan pynïasoh sha ka party watla na ka liang jong u, u pynpaw ba um pat lah satia ban shim rai.
Halor ka jingkylli kaei ka jubab kaba u Dr. Mukul u ai, na ka liang u Bah Hek u la ong ba haduh mynta hi um pat ong satia haoid lane em hynrei u la shu pan por ba un pyrkhat shwa. “Kumta ngi dang ai lad ïa u ba un pyrkhat halor kane,” ong u Bah Hek haba kren bad ki lad pathai khubor.
U Bah Hek haba jubab la ka party kan leit kren biang neem ïa u Dr. Mukul ka jubab kaba u ai ka long ba kin sa peit ha ka por kaba biang namar ïa ka BJP hi kam don jingeh ei ei la kin leh ha kano kano ka por ruh. La ïathuh ruh ba ha u snem ba la dep ki la dep ruh ban ïa kren ïa u Dr. Mukul halor kane.
Ha kawei pat ka khubor, u Bah AL Hek u la ïathuh ba ki don ki nongïalam na ki party riewlum kumjuh na ki national party kiba la sdang ka jingïakren bad ki nongïalam ka party bad ki pynpaw ba ki long kiba kloi ban wan pynïasoh sha ka party ha shwa ka elekshon MLA ha u 2028.
“Haduh mynta ki la don sawngut ki MLA kiba la wan ban ïa kren bad nga,” u la ong da kaba kyntait pat ban ïathuh ïa ka kyrteng ne na ka party ba ki don.
Shuh shuh u la ong ba na ka party hi ki plie beit ka jingkhang ïa kino kino kiba kwah ban rung bad trei bad ka party.
