ïa ka kheiñ ïap ïa ka wah Myntdu da u MDC-War Central bah Jamshaphrang Pohtam

Khliehriat iaiong 23: U President Khooid Ya Ka Wah Myntdu, u bah Khroo L Pariat u la pynpaw ka jingsngew pyrshah jur ïa ka jingkren u MDC jong ka Jaiñtia Hills Autonomous District Council, uba na ka constituency War central, u bah Jamshaphrang Pohtam, uba la ai jingkren ha ka jingialang hynnin ka sngi ha Motphran ba la khot pynlong jingialang da ka party Voice of the People Party (VPP) ha kaba une u MDC u la ong ba ka wah Myntdu, ka wah Prang, ka wah Kupli bad kiba bun ki wah kiba don ha ri lum Jaiñtia ki lah iap.
“Te halor kane ka jingkren jong u MDC jong ka JHADC, u bah Jamshaphrang Pohtam, nga hi shimet kum u trai ri, trai muluk uba im ba sah ha ri lum Jaiñtia harud ka Myntdu bad ki nongshong shnong kiba shnong ha shilynter ka wah Myntdu bad ïa nga shimet hi ka la ktah jur, namar nga la iohsngew lyngba ki pathai khubor ba u ong ba ka wah myntdu ka lah iap bad kiwei kiwei ki wah kiba don ha Jaiñtia, te halor kane ka jingkren jong u kaba u la kren ha ka jingialang ka VPP ka kath jur namar nga hi nga la dep phah ka jingujor sha ka NGT ha kaba ka jingbishar ka dang iaid mynta” ong u bah Khroo.L.Pariat.
U bah Pariat, u la ong ba kumno u lah ban ong ba ka wah Myntdu ka lah iap namar kat haduh mynta ka sngi, ki briew bad ma u ruh ki dang ioh ïa ka um bam um dih na ka tnat P.H.E, ki dohkha ruh ki dang don kum ha Syntu Ksiar kaba dei ruh ka Fish Sanctuary ba ki dohkha ki dang im, nangta ha Ialong, ha Tuberkmaishnong, ha Mukhaialong bad ha kiwei kiwei ruh ki bynta ba tuid ka wah Myntdu ki dohkha ki dang im, ka um bam um dih ruh dang ioh “Te kum u MDC uba don ka jingkitkhlieh na ka bynta ki nongshong shnong, trai ri, trai muluk lyngba ka JHADC uba lah don ka bor ha ka jingshisha um dei ban kren ïa kane ka ktien ban ong ba ka Myntdu ka lah iap, u dei ban kren ïa kane hapoh ka ïing dorbar ha JHADC ban iasaid, ban ïada, ban pynim kumba ngi ki nongshongshnong ngi la ialeh ban pynim bad ngi la wad ki lad ki lynti shaduh ka NGT ruh khnang ba ka sorkar jylla kan wan shakhmat, te ka jingkren ka jong u ka dei ban long ruh ka nuksa ïa kiwei ki para MDC namar ha kine ki sngi ba la dep ngi iohi ruh ba u nongialam ha ka liang pyrshah ha JHADC, u bah Andrew Shulai, uba dei u MDC ka Jowai, u la leit ban tuklar ruh sha kata ka jingshah thngan ka GFT na ka bynta u Lumpongdeng kaba don ha Ri Bhoi District, katba ïa ka Myntdu kaba u im u sah ha ka jingshisha kum u nongialam u la dei ban kren hapoh ïing dorbar JHADC, na kata ka daw nga buh ka jingkyntu ba wat ju kren klumar namar ba ka jingkren kaba dei ka politik leh ïa ka politik na ka bynta ka bynta ka jingbit jingbiang ki nongshong shnong ba ngin im ba ngin shngaiñ ym ban pyniap ïa kiba dang im, ym ban shu kren klumar tang na ka bynta ka myntoi ialade shimet ne ïa ka seng kaba phi ïa don, nga kyntu ruh namar ka don ka jing kren na ka liang u MDC Jamshaphrang Pohtam kaba u la kren shaphang u Long Sutnga, ba u la ong ba u Long Sutnga u dei uba la die ïa u Kiang Nangbah haduh ba ka sorkar phareng ka la ioh ban phasi ïa u ha iew Musiang hato lada ngi pat ngin ong ba mano ba dei u Long Sutnga mynta, uba die ia ka ri Jaiñtia ka jong ngi kaba la kyrkhu u Blei ba la die ïa ka Jaiñtia ha Motphran, na kata ka daw kum u briew uba don ka bor bad ka burom ba la shah jied ha ki paidbah to sngewbha kren hapoh ka JHADC kum u nongmihkhmat, kren kum u nongialam ka liang pyrshah, namar ka district council kaba peit ïa ki wah, nalor nangta ruh ngi ha ri Jaintia ngi iakren shaphang u dewiong bad ki briew ki dang ialeh shitom ba kumno ban thaw ki lad ki lynti ban ioh ban pyndonkam ïa une u maw hynrei ban ong ba ka Myntdu ka lah iap tang na ka daw uta u dewiong hynrei ka Myntdu ka dang im haduh mynta bad kan nang im shuh shuh” ong u bah Khroo L Pariat.
U kyntu ïa u MDC Jamshaphrang Pohtam ba u dei ban kren ïa kaei kaei ka ban tei lang ïa baroh bad ha kajuh ka por u bah K.L.Pariat u khot bad kyntu ruh ïa u MLA na Jowai, uba dei ruh u myntri ka sorkar jylla, u bah Wailadmiki Shylla ba ka la dei ka por ba un mih shakhmat ban tular ïa ka wah Myntdu kaba tuid na West Jaiñtia ter ter shaduh East Jaiñtia Hills District shaduh ri Bangladesh ba un wan shakhmat kum u myntri sorkar ban kren kum uta u nongmihkhmat ban ïada, ban im ka Myntdu bad ban im ki nongrep, ki paidbah ban don ki dohkha doh im ha ka wah, u kyntu ruh ïa u MDC Pohtam bad u MLA Wailadmiki Shylla bad kumjuh ruh u Symbud myntri rangbah, u bah Sñiawbhalang Dhar ryngkat lang bad ki paidbah ban don ka jingiatreilang ban wanrah ïa ka bha ka miat ki paidbah.