Shillong, Ïaiong 23: Ki Pulit jong ka East Khasi Hills ha ka step sngi Palei ka 23 tarik mynta u bnai kila shimti ïa ar tylli ki met ïap bad kawei kadei na Laban ba la suba sdien phasi bad kawei pat na 3 Mer, Upper Shillong.
La lap ïa katei ka met ïap na 3 Mer, kaba la teh da u tyllai na ryndang katba ka kti shilliang ka bat hajrong u nar ba ker bad ka met ïap ba shu shong, kaba don shabar jong kawei ka dukan, kaba don ha ka mala kaba ar jong katei ka iing, kaba don harud surok.
Ïa une u lanot la tip kyrteng kum u Vinod Kumar Singh (21) na 3 Mer.
Haba kren sha ki lad pathai khubor halor ka jingjia ba ha 3 Mer, u SP ka East Khasi Hills u bah Vivek Syiem ula iathuh ba u briew uba la khlad u dei uba la tip kum u Vijay Kumar Singh 21 snem ka rta uba na 3 Mer, Riatsohkhlur.Ia ka met ka jongu la lap ha ka por 5 baje mynstep hynne ka sngi Palei. Ki pulit kila suba jur ba ka lah ban dei ka jingjia jong ka jingsdien ne ‘Partial Hanging’.
“Ka rukom long jong ka met ka shong ha ka bynta jong ka jingkhang iit bad ula don u tyllai ha u ryndang, kaba pyni baroh ba kadei ka Partial Hanging. Kim shim la don kino kino ki dak mong ha ka met ka jongu. Ka pyni ba kadei ka jingbthat jubor ia la ka jingim. Watla katta ruh, ngin sa pynthikna shisien ba la pyndep ia ka jingleh ia ka jingkhmih bniah ia ka Post Mortem, hynrei kadei pat ka jingjia jong ka Partial Hanging.”
Ha kaba ïdei bad ka jingjia ha Laban kaba la lap ïa ka met jong uwei u briew ia kaba la kynnoh ba la suba sdien phasi ialade ha uwei u nar pynher lama jong ka Laban Police Station.
U Bah Vivek Syiem ula ong ba une uba la briew u kyrteng u Mithung Gurung 38 snem ka rta uba na Lumparing.La shem ba ula sdien ha u nar pynher lama jong ka police station da uwei u home guard volunteer katba u dang trei ia ka kam.
Kane ka jingjia kala jia ha ka por dang step phyrngab, ïa kaba la plie ia ka khyrdop ia ki paitbah ba kin wan rung.
“Ha ka jingshisha u home guard volunteer ula iohi ia une u briew shabar jong ka khyrdop bad ym shim la don ban poi pyrkhat namar ka jingsdien phasi ka lah ban jia tang da ki sekhon, kala jia sted bha. Une u briew ula rung (ha police station) ha ka por 6.43 pm bad hadien ka 7 minit ki pulit kila shem ba (ula sdien phasi ialade)” ong u Bah Syiem bad ka ong ba kane ka jingjia ka long kaba sngewsih.
U SP ula ong, “Na ka histori jong une u briew, ka paw la kumba u dei uba don ia ka jingduna ha ka bor pyrkhat pyrdaiñ bad u don ruh ia ka histori jong ka jingdih buaid. Kumta ka lah ban dei katei ka daw. Namar ka jingeh jong ka jingdih buaid kaba ngi lah ioh lum, u don ia ka jingeh ruh ha kaba iadei bad ka ‘Hallucination’. Lehse ka Hallucination ka lah ban wan haba u briew u sngew kumba u don jingma bad leit sha police station kadei ka lad kaba une u briew ula jied”.
“Kam dei ka jingkylli ha kaba iadei bad ka CCTV hynrei ha ka jingshisha ka CCTV kaba don hapoh ka police station, hooid kam shim la treikam shipor bad ngi lah shimkhia ban phah shna noh, hynrei ngi lah ioh ia ki video na ka Smart City bad ki video na kiba sah marjan (dei na kane) kala shim por (ban ithuh ia u briew) namar ba ym shim la don mano mano ruh kiban ujor halor ka jingjah briew” ula bynrap.
