Shillong, Ïaïong 23: Ki pulit ki la ïathuh ba u Bah Tomason Khongbuh u la phah ka jingujor ba ha ka 21 tarik mynta u bnai ha ka por kumba 1 baje mynstep, ki runar bym lah ban ithuh ki la tuh ïa ka thuk thuk jong u kaba don u nombar ML-05S-3903 napoh kawei ka jaka kaba hajan Pongtung CHC (EKH).
Ha kawei pat ka jingjia u Bah Kevin Shirley Suchiang u la phah ka jingujor ba ha ka 21 tarik mynta u bnai ha ka por 1.30 baje mynstep, ki runar bym lah ban ithuh ki la tuh ka thuk thuk jong u kaba don u nombar ML-05AD-6644 na Mawkasiang, Shillong.
Shuh shuh u Priyanku Choudhury u la phah ka jingujor ba ha ka 21 tarik mynta u bnai, ki runar bym lah ban ithuh ki la tuh ka thuk thuk jong u kaba don u nombar AS-14Q-2150 na Umsli, Bhoirymbong kaba hab hapoh ka Umroi PIC (RB).
