Phah jingthoh u Myntri ka tnad pule puthi sha Delhi ban kynthup ïa ka ktien Khasi bad Garo ha ka CBSE

Shillong, Iaiong 22: U Myntri ka Pule Puthi u Bah Lahkmen Rymbui ula phah da ka jingthoh sha u Myntri ka Sorkar Pdeng uba khmih ïa ka pule puthi ba kynthup noh ïa ka Ktien Khasi bad Garo ha ka Central Board of School Education (CBSE) Scheme of Languages bad ka maham ba ki khynnah pule ka Meghalaya kin mad ïa ka ‘jingduhnong’ hapoh jong ka ‘Three-Language Policy ba thymmai jong ka Board naduh u 2026–27.
“Dang shen ka CBSE ka la bthah ba ïa ki 3 tylli ki ktien– R1, R2 bad R3 bad ha ka Scheme of Language ka CBSE, Khasi bad ka Garo kim don satia. Kumta kan long kaba eh bha ïa ki khynnah pule ka Meghalaya namar ba ïa ka Khasi bad Garo ym shym la kynthup lang ha ki 44 tylli ki ktien ha ka CBSE,” ong u Bah Rymbui haba ïakren bad ki nongthoh khubor ha ka sngi Balang.
Ula ong, ba ka Khasi bad Garo ka dei kaba la ai ha ki skul CBSE tang haduh ka klas VIII, kumba la bthah da ka RTE bad ka National Education Policy na ka bynta ki ktien tynrai ne Mother Tongue Instruction ha ka Elementary Level. Hynrei hapoh jongka polisi thymmai ka CBSE, 3 tylli ki ktien kin long kiba kongsan naduh ka Klas VI naduh u snem 2026–27 bad ki Board Exam ha baroh 3 ha ka Klas X naduh u snem 2031.
“Ka jingeh ka long, kaei ka ktien kaba kin shim bad ïa ka eksam yn pynlong ha ka R1, R2 bad R3, kumta kan don ka jingeh ïa ki khynnah pule ka Meghalaya kiba pule ha ki skul kiba la ïoh jingithuh da ka CBSE kum ka JNV, KV bad kiwei kiwei ki jaka pule shimet” ula ong.
U Bah Rymbui ula ong, ba ki don 9 tylli ki skul kiba la pynïasoh bad ki CBSE hapoh ka jylla, nalor ka Jawahar Navodaya Vidyalayas, Kendriya Vidyalayas bad artylli ki Eklavya Model Residential Schools kiba la treikam ha Pahamsyiem bad Samanda. Kin don sa 36 tylli ki EMRS kiba dang dei kiban ïaid shakhmat.
“Palat ia ka 2000 ngut ki khynnah pule man la ka snem kin ïaleh ia ka eksamin jong ka CBSE” ula bynrap.U Myntri ula ong, ba ula rah mardor ïa kane ka mat bad ka CBSE hadien ba ka la pynmih ia ka jingpynbna.
“Hadien ba ka la mih ka jingpynbna na ka CBSE, Nga lah shim ïa ka por, nga lah ïakynduh ia u Chairman ka CBSE bad pynsngewthuh ïa u ba lada kam don ka ktien Garo bad Khasi ha ka Scheme of Language jongka CBSE, ki khynnah pule ka Meghalaya kin mad ïa ka jingeh kaba khraw”.
Ula bynrap ba ka kynhun myntri ha ka 16 tarik u Iaiong ka la rai ban pynlong ïa ka ktien Khasi bad Garo kin long noh ki Official Language ka Meghalaya.
“Nga lah phah da ka jingthoh sha u Myntri ka tnad Pule Puthi ka sorkar pdeng, nga lah ïakynduh ïa u Chairman ka CBSE bad ngan bteng ban shimkhia ïa kane ka mat bad nga ngeit skhem ba ha ki por ban wan ba ka Sorkar India, ka NCERT kan sa pynkhreh ïa ki kot bad ka CBSE kan ïoh ban wanrah ïa ka ktien Khasi bad Garo,” ong u Bah Rymbui.
“Kumba long mynta, lada ngim don ïa kino kino ki kot ki sla, nga lah ai jingmut balei bym pyndonkam noh da ki riewstad jongka MBOSE halor kane, ha kaba ïadei bad ka ktien Garo bad Khasi khnang ba ki khynnah pule kin ioh jingmyntoi”.
U Bah Rymbui ula ong, ba ka jingkynthup kan thaw ïa ki lad ban ïoh kam ïoh jam bad ban pynkhlaiñ ïa ka jingdawa pynrung noh ha ka Eighth Schedule.
“Lada ïa ka ktien Khasi bad Garo la ai jinghikai ha kine ki skul, kan plie ïa ki lad ki lynti jong ka jingïohkam ha ki skul ki bapher bapher” ula ong.
“Lada ngi lah ban pynkohnguh ïa ka Sorkar Pdeng kan long kaba sngewtynnad shikatdei eh kata katkum ka Resolution jong ka Sorkar Meghalaya ban kynthup ïa ktien Khasi bad Garo ha ka Eighth Schedule jong ka riti synshar ka India”.
“Nga don ia ka jingkyrmen kaba skhem ba ngan lah ban pynkohnguh ïa ka Sorkar Pdeng bad ka CBSE ha ki por ban wan, ïa ka ktien Khasi bad Garo yn sa hikai ha ki skul kiba la pynïasoh bad ka CBSE” ula bynrap.