Mynsaw 4 ngut na kawei ka longïing ba syllad u kyllang bad julor 16 tylli ki ïing

Nongstoiñ, Ïaïong 21: Ha ka step synïa jong kane ka sngi hatmajai ka 21 tarik Ïaïong u kyllang u ba jur u la syllad ïa ka shnong Mawlangbah kaba don harud ka surok na Rambrai sha Mawrok ha kaba khathynriew tylli ki ïng shong briew ki la julor.
U nongthohkhubor jong u Mawphor mar shu ïoh jingtip halor katei ka jingjia u la hiar sha katei ka shnong bad la ïoh ban ïakynduh ïa u Bah Nestarling Nonglang sordar shnong ha kaba u la ïathuh ba napdeng kitei ki khathynriew tylli ïng kaba la jur palat ka dei ka ïng jong u Bah Karmelius Lyngdoh bad ka kong BIsdalin Kharbani. Ha ka jingleit jngoh ïa katei ka ïng la lap ba ka la pra phum ha kaba ki lyntang bad ki tin, ki kba ki khaw ki jaiñ ki nep bad ki tum ki tam ki la shah rah sha kham pajih bad sah satang ka nongrim suda.
Utei u sordar u la ïathuh ruh ba u kyllang u la sdang ha ka por shi baje jong ka step synïa bad mar shu pyntip ïa katei ka jingjia u la leit wut wut sha katei ka jaka bad la lap ba u Bah Karmelius Lyngdoh bad ka lok jong u ka kong Bisdalin Kharbani lem bad arngut ki khun kata u Ribok Kharbani bad u Shngaiñbor Kharbani ki la mynsaw bad la pynkit noh wut wut sha Civil Hospital Nongstoiñ.
Ha kajuh ka por u la ïathuh ba ïa u Bah Karmelius Lyngdoh bad u Ribok Kharbani la pynkit noh sha Shillong namar ba ki la shitom jur katba ka kong Bisdalin Kharbani bad uwei u khun pat ki dang shah sumar ha Nongstoiñ civil Hospital.
Ha katei ka sngi la leit ban peit ïa ka shnong baroh kawei la lap ba ka Ïngmane jong ka Balang Presbyterian Mawlangbah, ka Lower Primary skul, ka ICDS centre ki dei kiba la julor bha bad wat ki post eletrik ruh ki la kyllon bad don ruh kiba la dkut. Haba kheiñ antad ïa ka jingjulor ha katei ka shnong ka la poi da ki phew lak tang ki ïng shong briew khlem da kheiñ ïa ki sem masi, ki sem sniang bad kiwei kiwei.
U sordar u la ïathuh ruh ba na ka liang ki briew jong ka sorkar kata na ka tnad pulit pynlip ding, ka Block, bad kiwei kiwei ki la poi ha katei ka jaka naduh ka por mynstep. Nalor kata la ïoh jingtip ruh ba ha ki la syllad ha West Khasi hills district ha ki bynta ba shaphang sepngi jong ka nongbah Nongstoiñ ha kaba ki katto katne ki shnong kata ha Nongsleh, Mawsaw, Tynrongmawsaw kiba hap ha ka Mawshynrut C & RD Block ki la shah ktah na ka jinghap u phria bad ka erlanthari.
Nalor kata ha ka shnong Nonglang kaba hap ha ka Rimuliang Block ki la don katto katne ki ïng kiba la shah jynrat ïa ki tnum bad kiba la julor bha na ka jinghap jong u phria hynrei ym shym la don ba mynsaw.