Ym ka draft scheme 2023 bad khlem ïoh bai bam tymmen ki nonghikai

Shillong, Ïaïong 21: Ki nongmihkhmat kiba dei ruh ki nonghikai na ki skul bad college deficit ba ïarap ka Sorkar Jylla bad kumjuh ruh na ka bynta kiwei pat ki nonghikai kiba la shongthait ki la pynpaw ïa ka jingsngewkhia halor ka jingpynmih jingpynbna jong ka Sorkar haba ïadei bad ka Meghalaya Non-Government Schools and Colleges Employees Centralised Fund Scheme, 2026.
Haba pynpaw halor kane u President ka KJDSTA u Babu Boswell Pala bad ka Dr. B H Buam Ritired Associate Professor PGT College ki la ong ba ki seng jong ki kynhun nonghikai bapher bapher ki la pynpaw ka jingai khublei ïa ka Sorkar bad khamtam eh ïa u Myntri Rangbah ka jylla u Conrad Sangma ba ha ka 1 tarik u Ïaïong la pynbna ban pynjlan ïa ka pension scheme kum ka jingithuh ïa ka jingnoh synniang ki nonghikai hynrei kum ki nonghikai ki pynpaw pat ka jingsngewkhia haba ïadei bad ka jingpynbna ïa ka Pension Scheme, 2026 kaba hadien ka jingïasyllok kaba la ai jingmut da kiba bun ki seng nonghikai ïa kane ka skhim la ïa kyntait da baroh bad la dep ruh ban ai sha ka Sorkar ïa ki mat kiba la dep ban pyrshah.
Ki la ïathuh ruh halor ka draft Scheme jong u snem 2023- kaba la dep ïakren sani bha bad kaba la buh da ka record hakhmat ka ïingbishar kaba long ruh kaba ïapher na ka Pension Scheme jong u 2026.
Ki la kynnoh ruh ba ka Sorkar ka la pynkheiñ ïa ki jingbhah ka Ïingkashari ba wat hapdeng ba la shah kyntait bad ba kane ka dang don hapdeng ka jingshah bishar, ka Sorkar ka la ïaid shakhmat ban pyntreikam da ka skhim 2026.
Ki la ïathuh ruh ba ki nonghikai kiba trei sha u Ïaïong u snem 2010 ki hab hapoh ki kyndon jong ka Meghalaya Non-Government Schools and Colleges Employees Centralised Provident Fund Act, 1969. Kito pat kiba la shah thung hadien u snem 2010 ki hab hapoh ka National Pension System, kumba la pynbna ha u Jymmang 2023 ka ba la pynbna paidbah ruh ha u Rymphang u snem 2025. Ki la pynpaw ba ka Pension Scheme u snem 2026 kam lah ban pynneh ïa ka jingpynïapher ba la buh kyrdan da ka ïingbishar bad na ka daw jong ka jingbym shai ka Sorkar halor ka skhim bai bam tymmen ki nonghikai ki hap mad ki jingeh mynta ha la ïing la sem namar lah bun bun snem ki bai bam tymmen ki la shu sahkut hapoh ki bank account, kumta ki la dawa ïa ka Sorkar ban shimkhia ïa kane ka jingeh ba ki ïakynduh la slem bha.
“Ka sorkar ka la pynmih ruh ïa ki jingpynbna ba la bthah ïa ki nonghikai, kynthup ïa kiba la shongthait bad kumjuh ruh kiba dang hikai ban plie ïa ki PRAN account hapoh ka rukom treikam kaba thymmai. Kane ka pynmih ïa ka jingsngewkhia kaba jur, ha kaba ka jingleh ka lah ban pynbor ïa ki nonghikai ban hap shim ïa ka Pension Scheme 2026 bad kaba lah ban pynkylla ïa ki hok ban ïoh ïa ki pension jong ki. Kumta halor kine ngi banjur biang ïa ka jingngeit ha ki kam jong ka ïingbishar bad ngi kyrmen ba ngin ïoh ia ki jingbishar hok jong ngi. Ngi kyntu ïa ka sorkar ba kan leh ïa ki kam katkum ki kyndon ba la buh bad ki ban long ruh na ka bynta ka bha ka miat jong ki nonghikai bad kumjuh ruh ki bym dei ki nonghikai, khamtam ruh ïa ki nongtrei kiba la shong thait kiba mynta ki mad ki jingeh halor ki kam pisa hadien ba ki la ai ki jingshakri da kiba bun bun snem,” ong ka Dr. Buam.