Shillong, Iaiong 21 : U Symbud Myntri Rangbah Bah Sniawbhalang Dhar ula ïathuh ba ka National People’s Party (NPP) ka la pynkhreh bha ïalade na ka bynta ka elekshon shiteng samoi ka Shillong Lok Sabha bad shen ka party kan sa shim rai ïa u/ka kyrtong ban mih aireng.
“Ngi la pynkhreh bha ïalade” ong u Bah Sniawbhalang haba ïakren bad ki nongthoh khubor ha ka sngi Ba-ar haba kylli halor ka jingpynkhreh jong ka NPP ia ka elekshon shiteng samoi..
Halor u kyrtong ka party, ula ong “Ngin dang ban shim rai. Ngin sa khot ïa ka jingïalang bad sa shim ïa ka rai mano ban long u/ka kyrtong jong ngi. Shen phin sa tip mano ba dei”.
U Bah Sniawbha ula pyntip ba ka jingslem ka dei namar ka jingdon bun kiba pan ticket. “Katto katne ngut ki la aiktien sha ka party. Na kata ka daw ka la shim katto katne ka por ïa ngi ban pynbna ïa u/ka kyrtong” ula ong.
Haba kylli lada ka rai jong ka BJP bad kiwei ki paralok ban pynïeng ïa la ki kyrtong kan ktah ne em ïa ka NPP, ula ong “Em, kan ym ktah namar ki la mih ban ïakhun haba pynshong nongrim ha ka jingdon ki vote bank. Kane kan ym dei satia ka jingeh. Lehse ka UDP kan buh, lehse ka BJP kan buh, lehse ka HSPDP kan buh. Kan ym don u ne ka kyrtong ïamonlang. Ngin ïakhun hi dalade”.
Halor ka jingjied ia u MP Rajya Sabha, u Bah Sniawbha ula ong “Ngin dang ïa kynduh ban shim rai ia kane. Ka party kan sa ïakren ïa kane ka kam bad kan sa ïarai lang halor kane”.
