Ka jingïakren pynbeit pud bad ka Assam kan long hadien ba ladep thaw sorkar thymmai

Shillong, Iaiong 21 : U Symbud Myntri Rangbah bad Chairman ka West Jaintia Hills Regional Committee u Bah Sniawbhalang Dhar ula pyntip ba ka jingïakren pynbeit ïa ka jingïakajia pud bad ka Assam kan sa sdang biang hadien bala dep thaw Sorkar thymmai ha kane ka Jylla ba markhap.
“Ka jingïakren bad ka Assam ka dei ka kam kaba ïai bteng. To ngin ap ynda la thaw ïa ka Sorkar thymmai ha Assam, ngin sa bteng biang ïa ka jingïakren. Kane ka long kaba shai” ong u Bah Sniawbhalang haba ïakren bad ki nongthoh khubor ha ka sngi Ba-ar.
Ula ïathuh ba ka sien shong jingïalang ban ïakren biang ïa ka kam ka shong ha ka Assam ba kan thung ïa ki Regional Committee.
“Kumba long mynta, ngim tip mano ban long Chairman na ka liang jong ki naba yn dang ban thaw ïa ka Sorkar thymmai. Tad hadien ba la thaw ïa ka Sorkar thymmai, kin sa thung ïa ka Regional Committee. Kin sa shim ïa ka rai hashuwa ba ngin ïakynduh biang” ula ong.
Haba kylli la ïa kine ki jingeh lah ban pynbeit hashuwa ka elekshon Meghalaya Assembly ha u snem 2028, u Bah Sniawbha ula ong ba kam don satia kano kano ka jingbuh da ka por.
“Em, ngi la pyrshang beit ban pynbeit ïa kane ka kam. Namar ka dei ka kam ba don bynta da ki Jylla, ngi la pyrshang ban pynbeit ïa ki jingeh kham kloi kat kaba lah hynrei kam dei ka kam kaba suk” ula ong.
“Ngam lah ban ong la ngin lah ne em ban pynbeit hapoh ka arsnem lane ha ka arbnai hynrei ngi la pyrshang beit ban leh kat kaba lah ha ka ban pynbeit kham kloi ïa kane ka kam” ula bynrap.