Dei ban shim ïa ka Ïewduh kum ka kamra shetja bad ka pliang la jong, sumar khuid ïa ka: Myntri

Shillong, Ïaïong 19: Ka ophis U Syiem Hima Mylliem ka la pynkhuid ïa ka Ïewduh ha ka Sngi U Blei bad kane ka dei ruh kaba ju leh manla u snem bad ha kane ka sngi la ïohi ïa ka jingïashim bynta jong kiba bun ban pynkhuid ïa la ki jong ki basa.
Ha kane ka sngi na ka liang ki nongtrei ka Hima Mylliem ki la sdang ïa ka jingpynkhuid ïa baroh ki basa bad hadien ba la dep ban pynkhuid bad khat ïa ki ñuit la synreit pat ïa ki basa da ka um ba la wanrah da ka Fire Service kumba 4 haduh 5 kali eiei bad kaba la pynlut hi na ka hima ïa baroh ki jingdonkam ha kane ka sngi.
Hadien ba la dep ban pynkhuid bad sait ïa ki basa da ka um ba la wan kit da ka kali ki pulit jong ka Fire and Emergency Service (F&ES), na ka liang jong u Myntri ka Hima Mylliem uba khmih ïa ka Tnat ka Khuid ka Suba (Sanitation) u Myntri War Tynghah u la ong ba kane ka jingpynkhuid ïa ka Ïewduh kaba la leh khnang ha ka sngi U Blei ka long kaba donkam bha bad kadei ruh kaba la rai da ka Dorbar Hima.
U la ïathuh ba ïa ka jingpynkhuid ym ju leh satia ha ki Sngi pohïa namar bun kiba im jakpoh, kiba ai ja, kiba bsa bad pynnang pynstad ïa ki khun da kaba die jingdie, kumta la rai ban pynlong ha ka sngi U Blei.
Haba ong ïa ki nongïew bad kiba wan ïew ban shim ne kheiñ ia ka Ïewduh kum ka kamra shetja la jong, kumta dei ruh ban bteng ka jingïatreilang bad ka Hima Mylliem ban pynlong ïa ka Ïewduh kaba Khuid bad kaba itynnad
Naba mynta ka Ïewduh ka la kham long kaba Khuid u Myntri u la kyrpad ïa baroh ban nang sumar bad leh Khuid hapoh ka Ïewduh.
U la ong ba kane ka jingpynkhuid kadei ruh na ka jingai buit aibor jong u Syiem naba ïalade ruh u long uba lehkhuid leh suba kumta la ong badei beit ban pynkhuid ïa ka manla u snem naba kane ka dei ka jingkitkhlieh jong ka Hima Mylliem bad ka Dorbar baroh kawei.
Kane ka jingpynkhuid kaba la sdang naduh ka por mynstep, la lah ban pynkhuid ïa baroh ki basa ba kynthup ïa ka Basa Syiar, Basa Dohkha, Basa Doh, ka Ïew Mawlong bad ka Stand Jeep nalor kiwei kiwei ki Basa, kaba dei ruh ba ka bynta ka bha ka miat jong kiba bun Balang bad khamtam kiba die jingdie bad kiba ju wan shapoh Ïewduh.
U Myntri u la ai khublei ïa baroh halor kane ka jingïaid beit ïaid ryntih bad ka jingkyrshan, ka jingïatreilang ba la pynlong ia kane ka sngi kaba jop.
U Myntri War Tynghah u la ong ba kane kadei ka jingangnud bad jingkyrpad jong u Syiem kumjuh ruh ka Dorbar na ka bynta ban wanrah ïa ka jingkhuid jingsuba jong ka Ïewduh khamtam ban bit ban biang ban suk ban saiñ ki nongdie nongthied bad ki nongleit nongwan ïew.