2 bnai ai por ka JNC ïa ka tnad PHE ba shna torti ïa ka skhim JJM ha West Jaiñtia Hills District

Shillong, Iaiong 17 : Ka Jaintia National Council (JNC) Western Zone ha ka Sngi Thohdieng, ka la aipor arbnai ïa ka tnad Public Health Engineering ba kan leh eiei halor ka jingkynnoh trei tang dep rukom ia ka skhim Jal Jeevan Mission (JJM) ha West Jaintia Hills district, lym kumta kan shim ïa ki sienjam kiba tyngeh.
Kane ka jingaipor kala wan jia hadien ba ka kynhun ba ïalam da u President ka JNC Western Zone Hamehi Bamon, ka la ïakynduh ïa u Executive Engineer ka Electrical Division bad u Executive Engineer jong ka Civil Division.
U Bamon ula pynpaw ba hadien ka jingïoh pdiang ïa ki jingujor na ki nongshong shnong, la shem ba bun tylli ki shnong ki la dep pyntrei ïa ki top um bad siang pipe, hynrei ka project ka la sangeh khlem ka jingpynpoi um sha ki longïing.
“Kane ka jinglong jingman ka la pynbitar ïa ki nongshong shnong bad ïa ka Council naba bun ki jingtrei la shu ieh khlem ka jing pynpoi um, kaba shu sah khongreng tang ka phrame khlem ka jingïaid ka um” ula ong.
“Watla katto katne ki shnong ki la ioh jingithuh da ka Tnad ba ki la pyntreikam ïa ka project, hynrei ka rukom pyntrei ka paw ba kam i don jingmut bad kam lah ruh ban ai jingmyntoi ïa ki shnong ki thaw”.
Ka Council ka la kam ba tang shiliang ki kam ki la dep trei. Ka kdew ba hapoh ka Jal Jeevan Mision, tang 25% na ki kam lah dep ban pyntrei, kaba pynsngewkhia shibun halor ka jinglah ban pyndonkam bakla ïa ka pisa bad ka jingkheiñ sting jong ka Tnad haba ïadei bad ka hok jong u paidbah.
Ka JNC ka la dawa ïa kine ki Executive Engineer ba kin shim khia haka ban pynthikna ïa ka jingpynpoi um sha baroh ki shnong bad ki jaka ba duna ka umbam umdih kaba biang bad kiba ka rukom sam um kim treikam bha,” ong ka JNC.
U Bamon ula pyntip ba ki Heh PHE ki la kular ïa ka Council ba kin sa leh eiei noh mardor ha kine ki khyndiat sngi ban wan bad ban hiar jurip ïa ka jinglong jingman ha kine ki shnong, khamtam ha kito ki jaka kiba ka um ka poi sha ki longïing lane bym sam um na ki top.
“Ka Council ka ai jingmut ïa ka Tnad ba kan leh eiei halor kane ka jingujor hapoh ka arbnai” ula ong.