Kajuh shi kajuh ka jingpynshai na ka sorkar, ngan bteng biang ka jingshah thngan, ong u Chairman Green Tech

Shillong, Iaiong 16: U Chairman jong ka Green Tech Meghalaya u Bah H B Nonglang u la shim biang ïa ka rai ban bteng ka jingshah thngan jong u wat hadien ba ha ka janmiet jong ka sngi Palei ba ka sorkar ka la phah biang da ka jingthoh lyngba Joint Secretary ka tnat ki Kam Jngohkai Pyrthei jong ka sorkar jylla sha u.
Ïa kane ka shithi ba la phah sha u Chairman bad la pynsngew pynsngap da u Secretary General u Samla Ritre Oo Lyngdoh uba la pule sha baroh kiba don ha kane ka jaka kiba la ai ka jingkyrshan ïa kane ka jingïakhih jong ka Green Tech halor ka jingthmu ka sorkar ban shna ïa ka Hotel ne ka Resort hapoh ka Dewlynnong jong u Lumpongdeng.
Ka shithi ba la phah da Joint Secretary sha u Chairman ka Green Tech ka ong, “Ka shithi ba la phah ka long halor ka kam jong ka Tourism project halor ka dewlynnong u Lumpongdeng, kaba la dep ruh ban buh da ka jingkyrpad na ka Green Tech ha ka 27 tarik u Lber, 2026, ka sorkar ka pynshai ba kan ym don ka jingailad ne ka jingshah ban tei shyrta hapoh ka Dewlynnong kaba ha Umïam kaba dei ruh kum shi bynta na ki kam pynroi kaba la shim da ka tnat lyngba ka PPP model kumta la kyrpad jur ba sngewbha ban wengnoh ïa ka jingïakhih shah thngan kaba khlem pud kaba la kyrpad ruh da ka sorkar jylla.”
Halor kane ka shithi na ka liang jong u Chairman pat u la pynphai kylla sha ka sorkar jylla bad sha u Myntri Rangbah da kaba ong, “Naba kane ka jingpynshai kaba wan na ka liang jong ka sorkar ka dei kajuh shi kajuh bad kam shym la don ka jingthoh kaba shai halor ka jingdawa ba dei ban pyndam noh ïa ka jingaiti ïa ka jaka kaba 36 akar sha ka Umïam Private Ltd bad ban pynphai biang ïa kane ka jaka sha ki paidbah ba ngin long trai biang sa shisien, ngin ïaibteng beit ban shong shah thngan ha kane ka jaka.