Ym donkam ban khot ïakren ka jingkhang jong ka sorkar ka ïai plie lada kwah ïoh jingshai: Dy CM

Shillong, Iaiong 15 : U Symbud Myntri Rangbah u Bah Prestone Tynsong ula ai ka jingkular ba ka Sorkar ka long kaba kloi ban ïakren bad ka Green Tech Foundation (GTF) kaba shong shah thngan khlem pud namar ka jingpyrshah ïa ka jingthmu ban tei ïa ka Taj Umiam Resort & Spa ha Umiam bad Lumpongdeng.
“Ka jingkhang jong ka Sorkar ka plie beit. Ngi la dep pynshai ïa ka nongrim jong ngi bad ngi long kiba kloi ban nang ai shuh shuh ïa ki jingpynshai lada donkam” ong u Bah Prestone.
Haba kylli la ka Sorkar kan phah briew ban khot ïakren ïa ki nongïakhih, ula jubab “Em, ym donkam. Ka jingkhang jong ka Sorkar ka long kaba ïai plie beit na ka bynta ban ïoh jingshai bad ban ïakren”.
U Symbud Myntri Rangbah ula kular ba ka Sorkar ka mut hok shisha ban ïada ïa ka mariang haba kyntiew ïa ki kam jngoh kai hapoh ka Jylla.
Ka GTF ka la dawa ban pynsangeh noh ïa ka project ban tei ïa ka Taj Umiam Resort & Spa haba pynpaw ïa ka jingsngewkhia ba ka lah ban pynjot ïa ka mariang. Ka Foundation ka la kynnoh ba kane ka project kan lam sha ka jingpynjot ïa ka sawdong sawkun jong ka dewlynnong bad ai jingmyntoi tang ïa ki katto katne.
Hynrei u Bah Prestone ula pynshai ba ka Sorkar kam don jingthmu ban shah ïa kino kino ki jingtei ba neh shirta ha dewlynnong Lumpongdeng. “Ngi la kular ba kan nym don ka jingpynjulor ïa ka mariang hynrei ngin nang pynitynnad shuh shuh ïa ka dewlynnong” ula ong.
“Kum ki juh ki kam bala leh ban pynitynnad ïa ka Nan Polok yn leh lang ha dewlynnong Lumpongdeng. Ngi nang thung dieng shuh shuh ban nang pynitynnad ïa ka khnang ba kan long kawei na ki jaka ba ki nongjngohkai pyrthei kin sngewtynnad eh ban wan” ula ong.
U Bah Prestone ula ban jur ba ka project ka dei kaba thmu ban kyntiew ïa ki kam jngohkai ha Jylla bad ka ban plie ïa ka lad aikam aijam ïa ki samla trai jylla.
“75% na ki nongtrei ka Marriott Courtyard bad Vivanta ki dei ki samla trai shnong, kiba la pyndep ïa ki jingpule jong ki ha ki hospitality sector” ula ong haba bynrap “Kiba bun ki samla jong ngi kila mih shabar jong ka Jylla ban leit pule ha ki hospitality sector kynthup ka hotel management. Kumta ngi kwah ban thaw ïa ki lad ïohkam ïohjam ha la ka jong ka Jylla”.
U Symbud Myntri Rangbah ula pynshai ruh halor ka jingbei pisa bad ki jingkynnoh ïoh jingmyntoi tang kito kiba don ha ka bor da kaba ong “Hato phi mut ban ong ba ka jingtei ïa ka Secretariat thymmai kan nang pynrben ïa ka pla tyngka jong ngi?. Nga kwah ban ong ba ka jingbei pisa ba ngi theh mynta ha ki jingtei kan pynmyntoi ïa ki pateng ba hadien bad kan dei ka jingsngew sarong ïa ki paidbah ka Jylla”.
Haba kylli la kane ka jingïakhih ka dei kaba khleh politics, u Bah Prestone ula ong “Ai ba ki paidbah kin bishar, ngam don eiei ban ong la ka dei kaba khleh politics ne em, ngam don ei ei ban ong hynrei ka kamram jong nga ka long ban pynshai. Na kata ka daw nga don hangne ban ai ïa ka jingpynshai kaba shai na ka liang ka Sorkar.