Ka kam jong ka MSPC Ka long ban ai jingmut ïa ka sorkar ym ban long jaka rieh tngen ïa ki Riew Saiñ Pyrthei : Suin

By Mawphor Editor On Apr 16, 2026

Shillong, Iaiong 15: U MLA ka seng UDP na Mawsynram bad dkhot ka Meghalaya State Planning Board (MSBP) Bah Olan Sing Suin ula ong ba ka kamram jong ka Board ka long ban ai jingmut ia ka sorkra bad ban pynthikna ba ki tnad sorkar ki dei ban pyntreikam ïa ki scheme ha ka lynti kaba dei ym ban ai jaka riehtngen ïa ki Riew Sain Pyrthei
Haba ïakren bad ki nongpathai khubor hynne ka sngi Balang, u Bah Suin ula ong, ba ka Board ka ïakynduh man la ka por hapoh ka jingïalam jong u Chairman u AT Mondal ban khmih bniah ïa ki prokram jong ki tnad sorkar.
“Ngi lah lum arsien ïa ka jingïalang bad khmih bniah ïa ki prokram kiba la pyntreikam da ki tnad sorkar, kiei ki jingduna bad ki jingeh kaba ki mad ha ka jingpyntreikam ïa kitei ki projek. Ngi ai jingmut ïa ka sorkar ïa kaei kaba ka dei ban leh ban pynbeit ïa kitei” ula bynrap.
“Ka Planning Board kam shim la pyntreikam eiei. Ngi ngim lah ban tuklar hynrei tang kawei ka long ba ngin ai jingmut ïa ka sorkar ne ïa ka tnad sorkar ba kan peit ïa ki lad ne ki kabu kiba thymmai kiba ngi lah ban leh” ula ong.
“La pyndonkam ïa ki Consultant da ki tnad kiba pyntrei ïa ka kam hynrei ka Board ka dei tang ka Advisory Committee”.
Halor ki jingkynthoh ba ka jingdon ka Board ka long ban ai jaka riehtngen ïa ki riewsaiñ pyrthei, u Bah Suin ula ong, “Lada ka Board ka dei tang ka jaka riehtngen ïa ki riewsaiñ pyrthei, kumta kam long kaba don jingmut. Hooid, ngi lah shong bad pynwandur ïa ki sienjam kiba dei ban shim ban peit ba ka jylla bad ki tand bapher ki dei ban pyntreikam ïa baroh ki scheme ha ka lynti kaba dei”.
U Bah Suin ula ong, ba ki la don ruh ki riewstad kiba la don bynta ha ki kam jong ka Board, “Ngi lah don bynta, ki riewstad ruh ki la don bynta lang ha ka Planning Board,” ula bynrap.
Ha kaba ïadei bad ka jingdheng kali ha Shillong, u Bah Suin ula ong, ba ka la don ka jingbiang ha kine ki khyndiat bnai kiba la dep hadien ba la dep ban plie ïa ki surok kiba thymmai.
“Ngi lah ïakren bad ki pulit bad ka tnad kam pohïing ban pynduna ïa ka jingdheng kali ha nongbah Shillong. Mynta ka jingdheng kali ka lah shu biang haba ianujor bad ki 5-6 bnai kiba la dep” ula ong.
“Phi ïohi ïa kane ka surok kaba leit sha Anjalee petrol pump, ïa kane ka surok kaba thymmai la dep ban plie bad kane ka la ïarap ha ka ban pynduna ïa ka jingdheng kali bad la lah ban law ïa ka sohkyrdot. Phi ïohi ba na Upper Shillong sha Umshyrpi, ka surok mynta ka dei kaba lah jan dep, kumta ngi ïohi ba ka jingïaid ki kali kala sdang ban biang” ong u Bah Suin.
Haba pynpaw ïa ka jingshem shimet ka jongu, ula bynrap “Man la ka por ba nga leit nangne sha Upper Shillong ka shim por shi kynta hynrei mynta ka shim por eh tang 15 ne 20 minit. Nga ïohi ba ha kane ka shi bnai ïa ka jingïapher ha ka jingdheng kali haba ïanujor bad ki 4-5 bnai kiba la dep”.