Shillong, Ïaiong 15 : Khnang ban pynkhlain shuh ïa ki lad jingïarap ha ka por ba wan lyngshop ki bor ka mariang na ka liang ka District Disaster Management Authority , East Khasi Hills District ka la pynkhreh mynta ban lum thup ïa ka jingdon ki drone ha ka distrik.
Kumta na ka liang ka District Disaster Management Authority (DDMA) ka kyntu bad pyntip sha baroh ki tnad sorkar bad kumjuh ki jaka treikam jong ki riew shimet, ki seng, ki agency kiba don haka distrik ba kin pyntip ïa ka jingdon jong ki drone sha ka DDMA, Shillong.
Katkum ka kyrwoh, la pyntip ruh ba ki riewshimet ne ki seng bad kumjuh ki agency kiba don ïa ki drone ki dei ban pyntip da ka mon sngewbha khnang ba kin lah ban ïarap pat ha ka por ba don ki jingjia shah lyngshop mariang.
Kumta la kyntu ïa baroh ba kin pyntip ïa ka jingdon ki drone, nangta ki jait model jong ki drone, ka jaka ba ki treikam, ki trai lane ki department, bad kumjuh ki jingtip kiba bniah jong ki trai drone kynthup ïa ka mobile number bad email address.
La kyntu ruh ïa baroh ba kin phah ïa kitei ki jingtip sha ka ophis jong ka Deputy Commissioner & Chairperson (DDMA) kham kloi lane lyngba ka email ddmaeastkhasihills@gmail.com.
Ka kyrwoh ka ong ruh ba kane ka sienjam ka long ban wallam ïa ka jingïatrei lang kaba jan ha ka por ba don ki jingjia shah lyngshop mariang bad ban pyntikna ruh ïa ka jingdon ki kor ki bor ban ïoh pyndonkam ha kum kitei ki por ba donkam.
