Ka 33 persen ïa ki kynthei ha ka kam synshar kan pynkylla dur ïa ka imlang sahlang : President BJP Mahila

Shillong, Ïaiong 15 : Ka State President jong ka BJP Mahila Morcha, ka Kong Arena Hynniewta ha ka sngi Balang ka la ïaroh ïa ka rai jong ka Sorkar Pdeng halor ka jingbuh kyrpang 33 percent ka bhah ïa ki kynthei ha ka kam synshar khadar, da kaba ong ba ka dei ka sienjam kaba donnam ka ban pynkylla ïa ka imlang sahlang.
Ha ka kyrwoh khubor, ka Kong Arena ka la ong hadien ka jingïaid paidbah kaba la pynlong ha Nongpoh da ki samla kynthei bad ki longkmie jong ka Ri-Bhoi district, ka thong hi ka long ban rah ïa ka khubor kaba kongsan sha man la ki dong, ki thain, bad ki district ha kylleng ka jylla Meghalaya.
“Ka jingthmu ka long ban pynsngewthuh ïa ki kynthei ïa ka burom bad jingithuh ba la ai ïa ki, bad kumno kane kan wanrah ïa ka jingkylla kaba bha ha ka jingkiew bad ka roi ka pa jong ka imlang sahlang,” ka la ong.
Haba ïadei bad ka Nari Shakti Vandan Adhiniyam, ka Kogn Arena ka la kdew ba kane ka aiñ ka pynlah ban ïoh kham bun ki nongmihkhmat na ka bynta ki kynthei ha ki Iing Dorbar thaw aiñ.
“Ka jingbuh kyrpang 33 persen ïa ki kynthei ha ka synshar khadar ka dei ka sienjam kaba thaw ïa ka histori, kaba pynlah ïa ki kynthei ban shim bynta kum ki nongthaw ain bad ki nongmihkhmat ha ki rynsan bapher bapher kum ki Members of Parliament (MP), MLA bad ruh kum ki MDC,” ka la ong.
“Kane ka jingthmu ka pynshlur ïa ki kynthei ban ïatreilang, ban pynkhlain ïa ka jingïatylli, bad ban wanrah ïa ka jingkylla kaba don jingmut.” Ka la pynksan shuh shuh ba ka jingïashim bynta jong ki kynthei ha ka kam nongïalam kan ïarap ban weng ïa ki jingeh ba kongsan kiba ki samla ki ïakynduh.
“Ka jingïashim bynta jong ki kynthei ha ka kam nongïalam kan ïarap ruh ban weng ïa kiba bun ki jingeh kiba ki samla ki ïakynduh, khamtam ha ka pule puthi, ka kam ka jam, bad ki lad ki lynti. Haba ki kynthei ki ïoh bor da ka bor, ki lah ban ïada bad ïalam kham bha ïa ki samla,” ka la bynrap shuh shuh.
Haba pynpaw ïa ka jingsngewnguh ïa ka Sorkar Pdeng, ka president jong ka BJP Mahila Morcha ka la ong, “Nga pynpaw ïa ka jingsngewnguh kaba khraw ïa ka sorkar kaba mynta na ka bynta ka jingkitkhlieh jong ka bad na ka bynta ban wanrah ïa kane ka aiñ kaba kongsan na ka bynta ki kynthei. Ki kynthei kim shah teh shah khum shuh ha ki kam bad mynta ki la ïoh bor ban ieng na ka bynta ka hok jong ki bad ban shakri kum ki nongshong shnong.”
Kum ka President ka la pynpaw ruh ka jingsngewnguh ïa u Myntri Rangbahduh ka Ri u Narendra Modi na bynta kane ka jingwanrah ïa ka bhah kyrpang na bynta ki kynthei.