Shillong, Iaiong 15 : Ka ïing Bishar ka la aibor ïa ki Pulit ka Jylla phra sngi ban tohkit ïa u Kennedy Khongsit, halor ka jingdonkti ban pyniap ïa ka longkmie ba 39 snem ha Nongrah, bad ki la dep ruh ban ïalam ïa une u briew sha ka jaka ba u pyniap ban phah batai bad pynwandur ïa kane ka kam bymman.
Haba pyntip ïa kane ha ka sngi Balang, u Superintendent of Police ka East Khasi Hills Bah Vivek Syiem ula ïathuh ba u Kennedy Khongsit, uba shah kem dang shen ba pyniap ïa u heprit 7 snem, ula shah phah sha ka police custody ba phra sngi halor ka jingpyniap a ka longkmie ba 39 snem, ka kong Eilang Phawa.
“Ngi la ïoh phra sngi ban tohkit a u Kennedy Khongsit halor kane ka kam, ngi la dep tohkit bun kiei kiei bad mynta ka sngi ngi la ïalam ïa u sha ka jaka ba u pyniap ba un batai nadong nadong hadien ba ula kubur ba leh ïa kane ka kam bymman” ong u Bah Vivek.
Haba batai bniah ïa ka jingphah pynwandur ïa kaei kaba jia, u SP ula ong ba u Kennedy ula ïalam ïa ka kynhun ki Pulit sha ka jaka ba u pyniap ha ka jingïadonlang ki nongsakhi shimet.
“Ula ïalam ïa ka kynhun ki Pulit ha ka jingdonlang ki sakhi shimet bad ula batai ba kumno ula leh ïa kane ka kam bymman ha kaba ula ïalam ïa ka sha lyndet ka ïing, sha ka jaka leit bar paidbah bad tangon ïa ka ha kawei na ki kynroh maw bad hadien ula thep ïa ka met ha byrni. Kane ka dei kaei kaba ula batai” ula ong.
U Bah Vivek u ïathuh ba ka kynhun Special Investigation Team (SIT) ka la trei shaid shaid ban pyndep noh shen ïa ka chargesheet.
