Pyrshah ïa ka Khimusniang SC yn tynjuh bor ka Nongkseh SSCC mynta ka sngi ha madan Polo

Shillong, Ïaiong 14 : Ka lympung ïalehkai jong ka 5th Meghalaya State League (MSL 5) kaba baroh ki ap khmih lynti ba kan sdang noh, kan plie pyrda mynta ka sngi da ka jingïakhun ba nyngkong hapdeng ka Nongkseh SSCC bad ka Khimusniang SC ha ka por 5 baje janmiet ha SSA Stadium ha Polo, Shillong.
Ha kane ka jingïakhun kaba hap ha ka Group A yn pynïakhun hapdeng ka jingsakhi lang ki nongkyrshan ba radbah na baroh arliang mamla. Ïa kane ka lympung ialehkai yn wan ban plie pyrda da u Myntri ka tnad ïalehkai ka sorkar jylla u Bah Wailadmiki Shylla kum u kongsan nalor ki nongialam ka Synjuk.
` Kumban shu phai dien khyndiat, ka Nongkseh ka dei kawei na ki klob kaba dang thymmai hynrei kadei pat kaba la kiew stet bha khamtam da ka jingdon ki rangïalehkai kiba kynsai kaba la pynlong ïa ka ban khur ïa ka nam lahduh jong ka First Division bad ka Champions Cup ha ka samoi ïalehkai jong ka Shillong Sports Association, khlem da kren ïa ka Sikkim Gold Cup kaba dang shu lah shen ha u Kyllalyngkot mynta u snem.
Ha kawei pat ka liang ka don ka Khimusniang, kaba dei ka kynhun ïalehkai kaba la rah ïa ka nam lahduh jong ka U Kiang Nangbah Memorial Trophy hadien ba ka la jop ïa ka phainal jong ka West Jaiñtia District Sports Association’s Super Division 2025. Mynta kane ka kynhun ka don ruh ïa ka thong ban knieh ruh ïa ka nam ba la maitphang da ka kynhun ba khlainbor ha ka WJDSA ka Niaw Wasa United kaba la jop ïa ka lympung ïakhun sdang jong ka MSL ha u snem 2017-18.
Mynta ka kynti, kan dei ruh ka sien ïa kynduh kaba nyngkong eh hapdeng kine ki ar tylli ki klob ha ka MSL, ka lympung ïalehkai ba la pynlong da ka Meghalaya Football Association ha ryngkat ka jingkyrshan jong ka Directorate of Sports and Youth Affairs, ka sorkar jylla.
Kumban shu phai dien khyndiat, ïa ka nam lahduh ha ka snem ba nyngkong la ïoh ban khur da ka Niaw Wasa United ha u snem 2017-18, hadien kane la bud pat sa ka Shillong Lajong ha u snem 2019, ka Rangdajied United ha u snem 2023 ba ka Mawlai pat ha u snem 2024-25.
Kumba ka paw hi, ki lai tylli ki klob kiba rah ïa ka nam lahduh ki dei na Shillong hi, hynrei ki don pat kiwei ki kynhun na kiwei ki distrik kiba la pyni ïa ka jingtbit jong ki ha kane ka lympung ïalehkai kaba heh ha ka jylla kynthup naduh ka Tynrongmawsaw bad Khliehmawlieh Youth Club kiba la wan ha ka kyrdan kaba ar katba ka Ladthadlaboh SC bad ka Rymbai Shkenshynriah SC ki la poi shaduh ka semi final ha u snem ba la dep.