Pyllait paidbah u ma S.K.Lato ïa ka kot ba kyrteng “ka Seiñraij kam ka Seiñ Niam”

Jowai, Ïaïong 12: Mynta ka sngi 12 tarik u Ïaïong, 2026 u ma S.K. Lato ula pyllait paidbah ïa ka kot kaba la ai kyrteng “ka Seiñraij kam ka Seiñ Niam”, haka jingwan sakhi lang ki khun ka Ñiamtre jong ka Raij Jowai.
Ha kane ka jingïalang la donlang u Deibha Rymbai, Secretary Ñiamtre Committee, Seiñraij, u Ladwan Dkhar, Chairman Art & Culture Committee, u ma O.H Toi President Seiñraij Jowai, u Dawiang Passah, Kni Kur Passah naka liang ki nongkren kila pynpaw ka jingsngewnguh ïa u ma S.K.Lato wat ha ka rta kaba la heh, ula lah ban pynmih ïa katei ka kot na ka bynta ka jingmyntoi ki khun ka Ñiamtre jong ka Seiñraij Jowai.
La kyntu jur ïa ki khun ka Seiñraij Jowai kiba ïoh ban pule ïa kane ka kot ba kin bishar bad pynshongnongrim bha ïaka bad la ai mynsiem ïa u nongthoh khnang ba un dang lah ban pynjanai shuh shuh ha ki sngi ban wan.
Na ka liang u ma S.K. Lato ula pynsngew ka daw kaba la pynlong ïa u ban pynmih ïa kane ka kot ka long halor ka jingkwah jong u ïa ki khun ka Seiñraij Jowai kiba im ha kane ka juk ba mynta ba kin tip shaphang ki kam ka Seiñraij ha ka jingïalam ki Waheh wasian, ki longkmie ki longkpa, ki khun samla hadien u snem 1947 ter ter khamtam ruh ha ki por kiba u don bynta bad ka Seiñraij kum u General Secretary naduh u snem 1966-1976 bad kum u President naduh u snem 1976-1984.
Ïa kane ka kot u ma S.K. Lato ula ai sha ka Seiñraij Jowai bad ula pynbna ba kane ka kot ka dei ka hok ka kynti jong ka Seiñraij Jowai.
Hadien ka jingïalang u ma S.K.Lato ula ai sngewbha ïa kane ka kot sha ka Niamtre Committee, ka Women’s Welfare Committee, Ka Khynroo Khyllood Committee bad sha ka School Managing Committee.