Jowai, Ïaïong 10: Ka Muphlang Government L.P. School, West Jaiñtia Hills District, mynta ka sngi Palei kala rakhe ïaka ‘Platinum Jubilee’ na ka jingdap 75 snem (1951-2026) haka shnong Muphlang haka jingïadon lang ki ophisar sorkar, ki nongïalam shnong, ki nonghikai, ki khynnah skul bad ki nongshong shnong ka thaiñ.
La sdang ïa ka prokram da ka jingkren ai khublei na u Wallambha Shylla, Vice Chairman ka School Managing Committee, la don ruh ka jingïalehkai Mass Drill da ki khynnah klas I haduh V bad ka jingshad na ki khynnah skul Pre-Primary.
Ka kong Ibaniakyntiew Lamare kala pynsngew ïaka History jong ka skul kaba la sdang ha u snem 1951 kum ka Mission School haka jaka jong ka Balang Presbyterian ha shnong Muphlang.Da ka jingkyrshan jong ki nonghikai, ki nongïalam shnong bad ki nongshong shnong ka skul kala nangheh bad hadien la ithuh da ka sorkar kum ka Basic School.
Ha u snem 1987 la pynkynriah noh ïa ka skul sha ka jaka ba ka don mynta bad ïa ka jaka la ai da ki shnong. Kane ka skul mynta ka don 5 ngut ki nonghikai bad ka jingdon ki khynnah skul ka long 187 ngut, kynthup 93 ngut ki khynnah shynrang bad 94 ngut ki khynnah kynthei kata naduh ka Pre-primary haduh ka Klas-V.
Na ka liang u Kongsan uba dei u Myntri ka tnad Pule Puthi ka sorkar jylla u ma Lahkmen Rymbui ula ai khublei ïa ki bor pynïaid skul, ki nonghikai, ki khynnah skul bad ki paidbah ka shnong Muphlang kiba la ïatreilang bad ka skul la palat hynñiew phew snem mynta. Ula pynshlur ïaki khynnah skul ba kin minot ha ki jingpule bad kyntu ruh ïa ki kmie ki kpa ba kin kyrshan ïa ki khun haki jingpule.
Haba pynpaw ïa ki sienjam jong ka Sorkar ha kaba pynkhlaiñ ïa ka tnad pule puthi, ula kdew ïa ki skim bapher bapher ba kynthup ïa ki Scholarship jong ki samla pule bad ki prokram ai jinghikai ïa ki nonghikai. U Myntri Rangbah ula pyntip ruh ba ka Sorkar ka dang ïai bteng ban pynbha ïaki jingtei haki jaka pule kiba don ha kylleng ka jylla.
Ha kaba ïadei bad ka memorandum ba la aiti da ki bor pynïaid skul, ula pynthikna ban ai ka jingkyrshan na ka bynta ban kyntiew ïa ka skul. Da kaba pynbna ban pynïoh jingïarap pisa haduh ?11 lak tyngka na ka bynta ban tei ïa ka ïing skul bad ka Store room.
U Kongsan ha kane ka sngi ula buh ruh ïa u maw nongrim ban tei thymmai ïaka ïing skul. Ha kane ka jingrakhe la pyni ruh ïa ki jingrwai bad ka jingshad tynrai da ki khun samla.
La pynkut ïa ka prokram la ïoh ka jingai khublei da ka kong Valentina Dugracia Chullai sha baroh kiba la wan sha kane ka prokram jingrakhe Platinum Jubilee kaba jop.
Kiwei de kiba ai jingkren ki kynthup ïa ka kong EDM Synrem, SDSEO Jowai, ka Dr. W. Sumer, SDEO Jowai, ma M. Swer, MDC bad u symbud kongsan ma A. Andrew Shullai, MDC ka JHADC nalor kiwei de.
