Hadien 12 snem, kem noh ki pulit ïa uba leh runar ïa i khyllung ba dang 3 snem 6 bnai

Mawkyrwat, Ïaïong 10: Ki Pulit ka Mawkyrwat Police Station mynta ka sngi ka 10 tarik u Ïaïong, 2026 ki la kem noh ïwei u runar uba la leh be-i-jot ïa iwei i khyllung ba dang 3 snem 6 bnai ha kawei ka shnong hapoh jong ka South West Khasi Hills District.
Ha ka tyllong khubor ba la phah da u Bah Banraplang Jyrwa uba dei u Superintendent jong ki Pulit ka South West Khasi Hills District u la ïathuh ba ha ka 13 tarik Risaw jong u snem 2014 la ïoh pdiang ïa ka ehjhar ne FIR ha Mawkyrwat Police Station ha kaba la kdew ba iwei i khyllung ba dang ka hi karta 3 snem 6 bnai i la shah leh be-ijot ha uwei u rangbah ba ha ki karta 55 snem.
Bad hadien kata, la ong ba mar mar la hap ban phah noh ïa itei i kyllung sha Shillong namar ka jingmynsaw kaba jur kaba i la mad ha kane ka jingleh donbor bad hadien kata ki sngi ki ïaid ka mukotduma ka kut noh ha kaba sdang ha ka ‘Final Report’ namar ba ym shym la don kano kano ka jingtip ha kaba ïadei bad u briew uba la shah kynnoh.
Kumta, halor kane ka jingjia, u Superintendent jong ki Pulit u la ong ba dang shen, i tei i khyllung iba la shah leh beiñ ryngkat bad ka jingkyrshan jong ka kmie bad kiba haïing hasem ka la wan shakhmat bad pynpaw ba ka lah ban ithuh ïa u nongleh kam sniew.
Namarkata, ki la buh ka jingkyrpad hakhmat ka Ïingkashari badonburom jong ka Mawkyrwat ban pynim biang ïa kane ka mukotduma kaba la ailad da ka Ïingkashari. “Hadien ba la rekod ïa ki jingkren jong i nongshah leh be-i-jot ryngkat ki sakhi, la kem noh ïa u runar ba la kynnoh ba u la leh sniew mynta ka sngi ka 10 tarik u Ïaïong, 2026”, ong u SP.