Nongpoh, Naitung 14: Na ka daw ka jingshah ktah palat ki paidbah ha Ri Bhoi District ha baroh ki liang kaba dei na ka jingthud palat ka bording ilektrik ha Ri Bhoi, ka Ri Bhoi Dorbar kan sa leit ban kynduh ïa u Myntri ka tnad bording na ka bynta ban ïa kren bad ban pynsngew ïa ka jingeh ki paidbah kiba shah ktah palat na ka jingthud ka bording ilektrik ha Ri Bhoi.
Ka Ri Bhoi Dorbar ka la pynpaw ruh halor kane ka jingeh ki paidbah, ka dei hadien ba bun na ki paidbah la jan na baroh ki dong bad ki thaiñ ka Ri Bhoi ki la pynpaw ka jingsngewkhia kaba jur halor ka jingthud palat ka bording ha Ri Bhoi, ha kaba ki shnong kiba shah ktah kim dei tang ha ki shnong nongkyndong, ,hynrei wat ka Nongpoh kaba dei ka Head Quarter ka District ruh ka kynduh lang kajuh ka jingeh kaba dei na ka jingthud ka bording Ilektrik.
Haba ïa kren bad u Mawphor, u President ka Ri Bhoi Dorbar, u Bah R.B Shadap, u la ong ba ka Ri Bhoi Dorbar ka dap da ka mynsiem jong ka jingsngewkhia halor ka jingud jingnam jong kiba bun ki paidbah nongshong shnong ka Ri Bhoi halor ka jinglip bad ka jingthud ka bording ilektrik bad kane ka jinglip lane ka jingthud palat ka bording Ilektrik ha Ri Bhoi ka la long sha ba palat bad ka la ktah shisha ïa ki kam ki jam jong ki paidbah ha kaba ha kane ka juk stad mynta la jan baroh ki kam la hap ban pyndonkam da ka bording ilektrik.
U la ong ruh kine ki jingshisha ki paw ruh ym tang ba ki paidbah ki la ud la nam halor ka jingthud palat ka brooding ha Ri Bhoi, hynrei lah ruh ban sakhi ba na ka por sha ka por ka bording ilektrik kam biang thikna bad ki paidbah kim ioh satia ban pyndonkam ïa ka bording katkum ka jingdonkam jongki ba ka bording ka ju thud bad lip na ka por sha ka por.
“ Ka Ri Bhoi Dorbar ka dap ruh da ka mynsiem jong ka jingsngewkhia ba ka tyllong ban tan bording ha ka jylla ka dei na Ri Bhoi bad haba phai pat sha ki paidbah kim ioh satia ïa kata ka bording kaba thikna kaba dei katkum ka jingdonkam jong ki paidbah” ong u Bah R.B Shadap, bad bynrap ruh ngim lah ban tip na kaei ka daw ba ka tnad MeECL kam lah ban pynbiang bording kumba angnud ki paidbah bad lada ka long ha kane ka rukom ka long shisha ka jingktah ïa ki paidbah ha baroh ki liang” u la bynrap.
Halor kane ka jingeh ki paidbah ka Ri Bhoi Dorbar ka la hap ban shim da kawei pat ka lynti bad kata ka long ban leit kynduh syndon ïa u Myntri sorkar ba dei peit ïa ka bording Ilektrik ha ryngkat ka dorkhas ban pynpaw ïa kane ka jingeh ki paidbah bad kumjuh ruh ba u Myntri ka tnad bording u dei ban shim khia na ka bynta ban ïa kren sha ka tnad MeECL khnang ba ki paidbah ha Ri Bhoi kin nym mad shuh ïa kane ka jingeh kaba dei na ka jingthud ka bording ilektrik ba ka tnad MeECL ka dei ban pynbiang thikna ïa ka bording ilektrik ha Ri Bhoi, u la bynrap.
Ha kawei ka bynta, ki paidbah ka thain Western Ri Bhoi ha ka thaiñ Jirang ruh ki ju mad ïa kane kajuh ka jingeh kaba dei na ka jingthud ka bording bad la ioh jingtip ruh ba mynta la shi taiew ka bording ilektrik kam poi thikna sha katei ka thaiñ ba ki paidbah ki la duhnong ha baroh ki liang bad wat ka CHC Patharkhmah ruh ka kynduh mawsiang na kajingbym biang ka bording ha kaba ki dawai ba dei ban buh ha ki store room ba pyndonkam da ka bording ki la sniew kaba dei na ka daw ka jingbym don ka bording ilektrik.
Kiba bun ki nongïalam na katei ka thaiñ ruh ki pynpaw ka jingeh kaba khraw bad ki da buh ruh ka jingkyrpad sha ka sorkar ba ki dei ban shim khia halor kane ka jingeh ki paidbah bad khamtam ba ka tnad MeECL ka dei ban shim khia ban weng ïa kane ka jingeh ki paidbah da kaba pynbiang thikna ïa ka bording ilektrik.
