Kup shatri ki khynnah skul Langdongdai Govt .L.P hapoh kamra ba leh matlah ka sorkar

Nongstoiñ, Ïaiong 09: Ki bor sorkar jong ka sorkar MDA haduh ka tnad kaba dei ïa ka pule puthi, kumba ka paw hi na ka jingpynmih ïa ka list jong ki skul kiba ïoh jingïarap, ka pynpaw shynna ba ka dei ka sorkar kaba noh shilliang bad leh matlah khlem da peit bniah bad bishar bha kino ki skul kiba dei hok ban ïoh jingïarap.
Katkum ka list jong kiba ïoh jingïarap na ka sorkar MDA 2 lyngba ka tnad pule puthi kaba la pynmih ha ka 30 tarik Lber 2026, la iehnoh khnang ïa ka skul Langdongdai Government Lower Primary School, wat haba la ïohi da ki snem ba ki khynnah skul ka Langdongdai Govt L.P School ki hap kup shatri haba ki don hapoh kamra class ruh.
Lah ban pynkynmaw ba man ka por khamtam ha ki aiom lyiur, ki khynnah skul bapli kim ïoh ban pynleit jingmut ban sngap bha ïa ka jingbatai kot ki nonghikai ïa ki jingpule jong ki, tang namar ba ka skul building ka jaw um bad jot.
Ha ka jingshisha ka Managing Committee ka la dep ai jingthoh bunsien sha ka office u SDSEO. Halor kane ka jingkyrpad jong ka MC, ka skul ka la ïoh jingbthah na office jong u SDSEO ban phah leh ïa ka estimate.
Kumta, na ka liang Managing Committee mar mar hi ka la pynlut na pla shibun ka pisa ban phah leh estimate bad la dep aiti ruh sha ka sorkar bad la ai jingthoh wat shaduh u khlieh ka District ruh na bynta kane ka jingeh.
Hynrei, kaba sngew phylla pat ka long ba ha ka list jong ki skul Govt. L.P School ban sa ïoh ïa ka jingshna pynbha ïa ki building, ka skul Langdongdai ka skul kaba la ai jingthoh bunsien bad kaba la pynlut bai estimate hi dalade, kam paw kyrteng satia haei haei ruh.
“Kane ka dei ka jingleh shilliang bad kaba paw shai kdar ba ka dei ka sorkar kaba peit shilliang khmat, ka sorkar kaba matlah bad kaba noh shilliang ka tarajur jong ka ha kaba ïa dei bad ki paidbah, khamtam kiba dei na ki thaiñ kham kyndong ha ka jylla”, ong u Chairman Managing Committee Langdongdai Govt L.P School West Khasi Hills District.