Ka sorkar ka dei ban pynlong da ka Special Session ban mynjur ïa ka ktien Khasi kum ka ktien sorkar

Nongstoiñ Ïaïong 09: Ka jingdawa jong ka Khasi Authors Society ïa ka sorkar ba kan pynlong official language lane ka ktien sorkar ïa ka ktien Khasi hapoh ka jylla ka dei kaba don nongrim bad kaba shong nia bad ka dei ruh ka kam ram jong ka sorkar jylla ba kan pyntrei kam ong u Dr.D.R.L.Nonglait president rangbah jong ka seng.
U Dr.Nonglait haba ïakren bad ki ladpathaikhubor hadien ka jingïalang paitbah ha Nongstoiñ u la ong ba halor katei ka mat u la ong ba lada ka sorkar ka mon kam don jingeh satia ban pynlong ktien sorkar ïa ka ktien Khasi namar katei ka mat kam dei satia kaba don kam ban da pan jingmut ne ïoh jingmynjur nangno nangno ruh hynrei ka bor baroh ka shong ha ka sorkar jylla.
Nalor kata u la ong ruh ba baroh ki jylla ha ka ri India kiba pyndon kam ïa ka ktien jong ki ha ka thoh ka tar , ka pule dangle bad ha baroh ki tnad trei kam jong ka sorkar kim shym la pynlong da kino kino ki jingpan jingmut na shawei pat hynrei dei ka sorkar kaba pyntrei kam.U la ong ruh ba ka seng ka sngewkhia jur halor ka jingsngap mynthi jong ka sorkar ïa ka jingdawa jong ka seng na kawei ka por sha kawei ka por bad haduh mynta mynne ka sorkar kam shym pat la pynurlong satia ïa katei ka jingdawa.
Ha kaba ïadei bad ka jingdawa u Dr.Nonglsait u la ong ruh ba ka seng ka dawa ruh ïa ka sorkar ba kan pynlong da ka jing?atai ba kyrpang hapoh ka Ïngdorbar Thaw Aiñ na ka bynta ban Amend ne mynjur ban kyntiew noh ïa ka ktien Khasi kum ka Official Language lane ka ktien sorkar bad ha katei ka jingïatai ba kyrpang ka sorkar ka dei ban khot lang ruh ïa ki nongïalam ka seng ban ïadon bynta lang.
Nalor kata u la ong ruh ba ha kine ki bnai ba la dep ka seng ka la pynkynmaw ïa ka sorkar lyngba ki jingthoh ba ka dei ban shim khia halor katei ka mat jingdawa.
Kumta halor katei ka mat jingdawa u Dr.Nonglait u la ong ba ka seng kam lah shuh ban shu ap sah da ki phew snem bad ban shu pyrta ïa kajuh shi kajuh khlem sei soh.
Ha kajuh ka por u la ong ba katei ka mat jingdawa kam dei wei satia ka mat tang na ka bynta jongno re hynrei ka dei kamat ba ka jaitbynriew ka don kam eh.Kumta u la kyntu ïa ki paitbah, ki sengbhalang, ki seng saiñ pyrthei ba kin ïa snoh kti lang bad ka seng na ka bynta ban pynurlong ïa katei ka jingdawa namar lada ïa ka ktien Khasi la ithuh kum ka ktien sorkar kan long ka jingmyntoi kaba khraw ïa baroh ki paitbah nongshong shnong jong ka bri u Hynñewtrep.
Khatduh eh u la ong ba na ka liang ka seng ka ai por ïa ka sorkar ba hapoh u bnai Ïaïong ka dei ban pynurlong ïa katei ka jingdawa bad lada ka sngap mynthi ka seng kam banse ban shim da kiwei pat ki sien jam kiba kham tyngeh.