677 tylli post nonghikai L.P ki sah khongreng ha ki skul Govt .L.P, aiu kan jia ïa ka lawei ki heprit: Powell
Shillong, Ïaiong 7: Ka long shisha ka jingduh ba khraw ïa ki heprit kiba dang pule ha ki kyrdan Lower Primary School jong ka sorkar, namar ki don haduh 677 tylli ki kam nonghikai kiba ka sorkar jylla kam pat thung kam pura haduh mynta bad aiu kan jia ïa ka lawei ki heprit.
Ïa kane la pyntip da u Executive Member (EM) ka Khasi Hills Autonomous District Council bad MDC ka Mawthadraishan Bah Powell Sohkhlet, da kaba sot na ka jingkren u myntri ka tnad pule puthi u Bah Lahkmen Rymbui ha kane ka dorbar kaba dang shu dep.
Haba ïa kren bad ki lad pathai khubor u Bah Powell Sohkhlet u la ïathuh ba napdeng kine ki 677 tylli ki kam nonghikai kiba lait ha ki skul LP ka sorkar, ka Eastern West Khasi Hills District ka don haduh 29 tylli ki kam nonghikai skul kiba dang lait ïa kaba ka sorkar kam pat thung kam.
“Mano ban buria ïa kane ka jingduna? Kumno arngut ki nonghikai kin ai jinghikai ïa 120 ngut ki khynnah?” buh jingkylli u Bah Powell haba pynpaw ïa ka jingktah ïa ka lawei jong ki khynnah skul.
Ula kyrpad ia ka Sorkar Jylla ban thungkam noh mardor ha kine ki kam ba lait da kaba ong “Kiba bun kila pass ia ka Meghalaya Teachers Eligibility Test (MTET) bad Dl.Ed.Balei ba pynslem ia ka jingthungkam”.
U Bah Powell ula ai nuksa ia ka skul Lower Primary ka Sorkar ha Eastern West Khasi Hills kaba don tang iwei I nonghikai, kaba la hap khang ia palat lai taiew hadien ka jingpynkynriah kam noh ia i nonghikai.
Ula ai jingmut ban pynbeit ryntih ia ka jingbuh nonghikai bad ong “Ki don ki skul ba don tang 10 ngut ki khynnah bad arngut ki nonghikai katba kiwei kiba don palat 100 ngut ki khynnah ki don hi tang arngut ki nonghikai.Ka Tnad Pule Puthi ka dei ban pyniasoh lang ia ki nonghikai na ki skul ba duna khynnah bad kito kiba bun khynnah, ban pynthikna ia ka pule puthi kaba biang ia baroh”.
U Bah Powell ula ban jur “Ki khynnah skul jong ngi ki don hok ban ioh ia kaba bha tam. Nga kyrpad ia ka Sorkar ban leh eiei noh mardor ha kaban pynbeit ia kane ka kam”.
Haba nujor mynta ka sngi ba mih ka result SSLC ha kaba ki skul jong ki Balang bad ki skul jong ki riew shimet ki pass bha bad wan ha ki kyrdan ba ha khmat, u Bah Powell u la ong lehse dei na kine ki daw ba ki skul jong ka sorkar kim da paw bha.