Jur ka jingshah tuh ki kali ar shaka ha Mairang, kyntu u SP ban peitngor
Nongstoiñ, Ïaiong 05: Ka ophis jong u Superintendent of Police Eastern West Khasi Hills District Mairang, ka la bthah ïa baroh ki nongshong shnong khamtam, ki trai kali hapoh ka District ba kin long kiba peitngor bad husiar hadien ba la don ka jingjia shah tuh jong ki katto katne tylli ki kali ar shaka kum ki motorcycle bad scooty na ki bynta jong ka Pyndengumiong kum ka Lummarlong, Umwiehsup and Lumïew hapdeng ki kynta 10:30 mynmiet haduh 2:30 step phyrngap jong ka 1 tarik bad 2 tarik u Ïaiong 2026.
Na ka liang ki pulit ki la pynpaw ba ka lah ban don ka jingïasylla ban tuh ïa kito ki kali kiba pynieng shabar na ki ïing briew ha ka por miet ba la kynjah. Ha kaba ïadei bad kane, na ka liang ki pulit ki la pynlong ïa ka jingthwet ban lap ïa kiba donkti.
Ha ka juh ka por, la kyntu ïa ki nongshong shnong bad ki trai kali ba kin long husiar bad peitngor bad kiar na kaba pynieng ïa ki kali jong ki ha ki jaka ba long kynjah ki bym da long shngaiñ. Ki dei ban pyndonkam da ki jingpyndait tala kiba kham kyrpang bad skhem bad ruh ban buh ïa ki CCTV camera.
Shuh shuh, la kyntu ïa ki bor Shnong ba ki dei ban pynkhlaiñ ïa ki bor Shnong ha ka ban peitngor bad ai ka jingïatreilang na ka bynta ban rat dyngkhong ïa ki kam sniew, ban pynïoh ïa ka jinglong shngaiñ ha ki shnong ki thaw.
Lada don kino kino kiba don jingtip, la kyrpad ban pyntip sha ki police station kiba hajan eh lane ban phone ha u helpline number 112 lane ha ka police control room +91 7629981814.