Shillong, ïaïong 03: Ka Langsning CC ka la pynliem noh da 7-wiket ïa ka Young Guns CC ha ka wat ïakhun Super 8 ha ka Group 1 jong ka lympung 1st Late PA Sangma Memorial T20 Tournament ba la pynïaid da ka Shillong Cricket Association, ha madan kriket ha Polo, ha ka sngi Palei.
Haba shimti ban tied nyngkong ka Young Guns ka la shah weng noh baroh 10 wiket na ka bynta 107 ron haduh kaba kut ki 20 ober. La lamkhmat ïa ka tied da u Angkit Tamang (24 ron naki 19 bol) bad u Aditya Singh (25 ron naki 34 bol). Naki nongkawang bol jong ka Langsning, u Bishal Roy u la khur 3/14 haki 4 ober, katba u Riboklang Hynniewta u la khur 2/12 haki 3 ober.
Haba beh ïa ka thong, ka jingnoh synñiang kaba khraw na u Bamanbha Shangpliang (53 ron naki 43 tylli ki bol) bad u Dipankar (25 ron naki 24 bol) ka la ïarap ïa ka Langsning ban kynjoh 111 ron da kaba khyllem tang 3 wiket haki 13.4 ober. ïa ka khusnam Player of the Match la khur da u Bishal.
Kin don ar tylli ki jingïalehkai ha kane ka sngi Saitjaiñ (04 tarik ïaïong), ha ka por 8:30 baje mynstep ka Sputnik CC kan ïakhun pyrshah ïa ka Lok Bhawan (Group 1), bud sa ka jingïalehkai hapdeng ka Rangkynsai CC pyrshah ïa ka Capital Stars (Group 2) ha ka por 12:30 baje mynsngi.
