Mawkyrwat, Ïaïong 01 : Ka long kaba pynkmen ïa ki kmie ki kpa ba tang hadien 1 sngi ba ki la jah na ïing, ïa ki ar ngut ki samla la lap na kawei ka jaka ba ki khot ka Synrang Mawrin kaba don ha Shnong Mawten, South West Khasi Hills District.
Lah ban pynkynmaw ba ka jingjah jong ki ar ngut ki samla ba dang 17 snem bad kawei pat ba dang 16 snem ki la jah naduh ka step jong ka 30 tarik u Lber, 2026. Ym tangkata, ki la ïathuh ruh ba tang mar ïa tip ba ki la jah, ki kmie ki kpa ki la pyrshang ban wad naduh mynnin ka sngi 31 tarik u Lber, 2026 hynrei kim lap satia ia ki bad kim tip ki don shaei.
Katkum ka jingïathuh jong u bah Verlin Marweiñ uba dei u kñi u la ong ba ha ka jingïai pyrshang jong ki ban wad naduh ka sngi ba ki la jah kan shym la urlong, hynrei kaba pynkmen ka long ba dei tat ha ka janmiet jong ka 31 tarik u Lber, 2026 ha ki por 5 baje ei ei la shem ïa ki na Synrang Mawrin, Mawten.
Hadien ka jinglap ïa ki la ong ba la ïalam ïa ki baroh ar ngut da ki Pulit sha Mawkyrwat Civil Hospital ban phah leh ïa ka medical Check-Up bad la lap ba kim lei lei bad la aiti ïa ki sha kiba ha ïing ha sem.
Kumta kum kiba ha ïing ha sem lyngba u bah Verlin Marweiñ ki la pynpaw ka jingaikhublei bad sngewnguh na ka bynta baroh kiba la don bynta ha ka ban leit wad ïa kine ki ar ngut ki samla bad kumjuh ïa ka tnad pulit kaba la ïarap ban track ïa ka phun lyngba ki kor ki bor jong kane ka juk.
