SHILLONG, ïaïong 01: Ka Young Guns Cricket Club bad ka Royal Cricket Club ki la jop ïa la ki jong ki jingïalehkai Super 8 jong ka lympung Late P.A.Sangma Memorial T20 Cricket Tournament 2026 ba la pynïaid da ka Shillong Cricket Association, hynne ka sngi Balang ha madan kriket MCA, ha Polo.
Ka jingïalehkai ha ka por mynstep la sakhi ïa ka Young Guns CC kaba la jop da ka said da tang 8 ron pyrshah ïa ka Lok Bhawan ha ka Group 1, nangta ka Royal Cricket Club ka la pynliem noh da 3 wiket ïa ka Rhinoland Cricket Academy ha ka Group 2.
Ka jingnoh synñiang kaba khraw na u Angkit Tamang (80 ron naki 38 bol) bad katto katne na u Rudra Singh Rathore (24 ron naki 19 bol) ka la ïarap ïa ka Young Guns CC ban kamai 115 ron da kaba hap tang shi wiket ha ki 10 ober.
Hadien nangta, ka Young Guns CC ka la lah ban khanglad noh ïa ka Lok Bhawan tang na ka bynta 107 ron haduh kaba kut ki 10 ober, bad pynkhyllem 8 wiket. Ki nongtied kiba kongsan ki long u Jied (22 ron naki 14 bol) bad u Asif Khan (17 ron naki 8 bol).
U Rudra Singh Rathore (2 ober: ailad 14 ron) bad u Girish Raj Ray (2 ober: ailad 19 ron) ki la ïoh ban khur mar 2 wiket, hynrei ïa ka khusnam Player of the Match la khur da u Angkit Tamang uba la noh synñiang 80 ron ha ka por tied.
Ha ka jingïalehkai kaba bud, ka Rhinoland CA ka la tied 168 ron bad hap 8 wiket haduh kaba kut ki 20 ober. La lamkhmat ïa ka tied da u Rohit Sen (30 ron naki 18 bol) bad u Raj Agarwal (29 ron naki 27 bol). Naki nongkawang bol jong ka Royal CC, u Dippu Sangma (4 ober: ailad 21 ron) bad u Reshabh Dipak (4 ober: ailad 38 ron) ki la khur mar 2 wiket.
Ka Royal CC ka la pyndep ïa ka kamram da kaba hap 7 wiket ban kynjoh 171 ron haki 18.5 ober, ha kaba u Raj Biswa u la kamai 48 ron naki 28 bol, katba u Tarique Siddique u la noh synñiang 25 ron naki 18 bol.
Na ka liang jong u Sumit Kashyap (3 ober: ailad 19 ron) bad u Raj Agarwal (4 ober: ailad 33 ron) ki la ïoh ban khur mar 2 wiket, hynrei ka kynhun kam shym la lah satia ba kan khanglad ïa ka Royal CC kaba la jop da 3 wiket.
ïa ka khusnam Player of the Match la ïoh khur da u Raj Biswa uba la kamai 48 ron ha ka tied bad khur 1 wiket ha ka boling.
