Dawa ka CoMSO ban pyntreikam ïa ka SIR ha Meghalaya bad ban pynkylla ïa ka ST Order 1950

Shillong, Lber 31: Ka Confederation of Meghalaya Social Organizations (CoMSO) ha ka sngi Ba-ar ka la shim ïa ka rai ban thoh sha ka sorkar jylla, da kaba kyntu ba dei ban pynlong noh mardor ïa ka Special Intensive Revision (SIR) jong ki thup kyrteng ki nongthep vote bad ban pynkylla ne amendment ïa ka Scheduled Tribes Order 1950.
Haba kren sha ki lad pathai khubor hadien ba la wai ka jingialang, u chairman ka CoMSO u bah Roy Kupar Synrem u la ong ba ka seng ka la dep ban aiti ïa ki jingai jingmut sha ka Union Home Ministry bad ka Election Commission ka ri India, da kaba pynbor ba ia ka SIR dei ban pynlong kloi noh hapoh ka jylla Meghalaya.
U la pynpaw ba katei ka jingdawa ka mih na ka jingsngewkhia kaba nang jur halor ka jingkynnoh ba don ki briew kiba wan rung be-aiñ ha ka jylla, kaba katkum ka jingong jong ka CoMSO, ka la pynlong ïa ki bym dei ki nongshong shnong ban ioh rung kyrteng ha ka thup nongthep vote bad ban ïa shim bynta ha ki elekshon.
“Hadien habud, kane ka kan ktah jur ïa ka hok bad ka ïa ka lawei jong ki riewlum trai ri trai muluk”, la ong u Bah Synrem.
Shuh shuh u la kdew ïa ki kam kiba la leh kum ha ka jylla Bihar bad West Bengal, la dei ban pyntikna ba ki kyrteng jong ki nongthep vote kidei ban long kiba khuid bad kaba thikna.U la pynpaw ruh ïa ki jingsngewkhia halor ki “jingthep vote ar jaka” ha ki thain khappud, khamtam hakaba ïadei bad u pud u sam jong ki jylla bad ka jylla Assam.
Ha kaba ïadei bad ka mat kaba ar, u Bah Synrem u la pynpaw ïa ka jingdonkam ban pynkylla ne amend ïa ka Scheduled Tribes Order 1950, da kaba ong ba ka jylla Meghalaya kala ioh ïa la ka jong ka jylla la palat san phew snem mynshwa, hynrei ka thup kyrteng jong ki jaitbynriew trai ri trai muluk ki bym dei napoh ka jylla Meghalaya ba la ithuh ka dang sah haduh mynta khlem jingkylla naduh ka por ba ka dang ïa long bad ka Assam.
U la kynnoh ba ka rukom treikam kaba mynta ka ailad ïa kiwei ki jaitbynriew riewlum na kiwei pat ki jylla ban ïoh ïa kijuh ki hok ha Meghalaya- kum ka jingïoh thied jaka puta, ka jingpynskhem kum ki ST, bad ka jingïashim bynta ha ki elekshon- katba ka jingithuh kaba kum kane kam shym la pynïar sha ki jaidbynriew Khasi, Jaiñtia bad Garo sha kiwei pat ki jylla, kynthup ïa ka Assam bad ki bynta jong ka jylla Manipur bad kiwei kiwei de.
Ka CoMSO ka la pynpaw ruh ïa ka jingsngewkhia halor ka jingbym lah ban pynïaid shaphrang da ka comittee ba la thung da ka sorkar jylla kaba la thaw ha u bnai Nohprah jong u snem 2024 ban peit bniah ïa ka ST order.
“Wat hadien shi snem tam, ym pat don jingshai halor ki jinglap ne jingai jingmut jong ka”, la ong u Bah Synrem.
Ka seng kan sa aiti ïa ka shithi sha ka sorkar jylla mynta ka taiew, ka ban ai por 45 sngi ïa ka sorkar ban rah ia baroh ar tylli ki mat bad ka sorkar kmie.Ka thmu ruh ban ïa kynduh bad baroh ki seng sain pyrthei bad ki synjuk waheh shnong bad ka synjuk ki rangbah shnong bad baroh ki nong ia don bynta lang ban pynsngewthuh paidbah bad ruh ban ioh ka jingkyrshan.
U Bah Synrem u la maham ba lada ym lah ban leh eiei hapoh ka por ba la buh, ka CoMSO kan sdang ïa ki sienjam, kynthup ïa ki jingïalang paidbah ryngkat bad ki jingïakhih .
Shuh shuh u la ban jur ba ïa ka SIR dei ban leh ha baroh kawei ka jylla, kynthup ïa ki jaka sor kum ka nongbah Shillong, bad ym dei ban pynlong tang ha ki thaiñ ba kyrpang.