Ka Mission 1000 Sngi kan ïarap ban pynïoh ïa ki jingbam ba teimet ïa ki khynnah bad ki kmie

Shillong, Lber 31 : Kum shibynta ban pynïoh ïa ki jingbam ba tei met ïa ki Khunlung bad ka jingkoit jingkhiah ki Kmie, u Myntri Rangbah ka Jylla Conrad K Sangma ha ka sngi Ba-ar, ula pyllait paidbah ïa ka Mission 1000 Sngi ka prokram ba la mang kyrpang ban pynlut 217 klur tyngka ban kyrshan ïa ki Kmie naduh ka por ba ki dang pun ïa I Khunlung haduh ba I Khunlung in dap arsnem.
Kane ka Mission ka thmu ban ïakhun ïa ka jingeh kiba dang don haduh mynta kum ka jingpang swai, ka jingïoh duna ïa ki jingbam tei met, bad ka jingbym biang ha ka jingsumar sukher naduh ka por khunlung khamtam ha ki jaka nongkyndong.
Haba kren ha ka jingïalang ba pyllait paidbah ïa ka Mission u Conrad ula ong ba kane ka prokram kan ai ka jingshakri ïa ki Kmie ha ka por ba ki dang ai buiñ bad ki Khunlung kiba dang heh dang san. U la bynrap ba kane ka jingthmu ka dei shi bynta jong ka rukom treikam kaba kham jylliew, kaba pynshong nongrim ha ki sakhi ban pynbha ïa ka lawei ki khynnah bad ki longkmie ha ka jylla.
“Ha ka por ba nga shimti ïa ka Ophis ha u 2018, kawei na ki mat ba kongsan eh kaba pynsngewkhia bha ïa nga ka dei ka jingbun ki Kmie ba iap ha ka por kha khun ha Meghalaya. Ka pynkhuslai ym tang ïa ka nga hynrei ïa ka kynhun myntri baroh kawei, bad ngi larai ban leh kat kaba lah ban pynduna ïa ka” ula ong.
Kane ka Mission ka kynthup ïa ka jingkyrshan ha ka jingpynïoh ïa ki jingbam tei met, ki jingïalang pynsngewthuh paidbah, ki jingai jinghikai bad ka jingsam ïa ki tiar jong ki Kmie bad ki Khunlung, ka ban pynshong nongrim na ki jingai jingtip ki Nongtrei ba hakhmat eh (frontline worker).
Haba ban jur ïa ka jingdonkam ban buh ïa ki mat ba kongsan ha ka synshar khadar, u Myntri Rangbah ula ong ba ka Sorkar kala pynleit jingmut ha ka ban leh eiei ïa ki jingeh kiba ktah duh. “Ngi la pyrshang ban pynbeit ïa 60-70% na ki jingeh kiba hakhmat eh, kiba lah ban wanrah ïa ki jingpynbha kaba ïar ha ki dak ki shin baroh” ula ong.
Ki Heh Ophisar ki pynpaw ba ka 1000 sngi ba nyngkong ha ka jingim ki Khunlung ka dei kaba kongsan eh ha ka jingheh jingsan ki khunlung, ha kaba jan 75-80 % na ka jingtei ka jabieng ka jia ha kane ka por.
Haba kren halor ka vision ba bun jong ka Jylla, u Conrad ula ong ba ka jingkiew ka ïoh ka kot ka dei ban hap pynbiang tara jur bad ka jingpynbha ha ka koit ka khiah bad ki jingbam tei met. Ula pynsngew ruh ïa ki jingeh ha ka imlang sahlang bad ka ïoh ka kot, haba pynpaw ba bun ki kynthei ki shah pynbor ban leit sha la ki jong ki jingtrei hadien ba kha khun namar ka jingeh ka pisa pilaiñ, kaba ktah ïa ka jingri jingsumar ïa ki Khunlung.
Haba khot ïa ka jingïashim bynta lang jong baroh, u Conrad ula ong ba ka Mission ka dei ban long ka jingpyrshang jong baroh. “Kane ka dei ban long ka jingïaleh jong u paidbah” ula ong.
Hadien kane ka jingpynlait paidbah la pynbud pat da ka jingsam ïa ki tiar jong ki Kmie bad ki Khunlung bad ka jingpynlait ïa ki kot lyngkdop jongka Chief Minister Headmen Fellowship.
ïa kane ka Mission 1000 sngi la kyrshan lang ruh da ka Meghalaya Early Childhood Development Mission (MECDM), Meghalaya State Rural Livelihoods Society (MSRLS), National Health Mission, Food Safety and Standards Authority of India (FSSAI), State Capability Enhancement Project (SCEP), Har Ghar Jal – Jal Jeevan Mission bad kiwei kiwei.
Kiwei pat kiba ai jingkren ki kynthup ïa u Addl Chief Secretary bad Development Commissioner Sampath Kumar, ka kong CD Lyngwa, Director ka Tnad Social Welfare bad kiwei kiwei.