Da ki thuk thuk bad ka kali kit ñiut ïoh ka Hima Sohra na ka Rotary Guwahati Luit Trust

Shillong, Lber 31: Shillong, Lber 31: Ka Rotary Guwahati Luit Trust lyngba ka jingnoh synñiang pisa da ka Hotel Polo Towers Ltd., Shillong bad da ka Manor Floatel Ltd., Kolkata, ha ka sngi Ba ar ka 31 tarik Lber 2026 ka la aiti saw tylli ki thuk thuk bad kawei ka trok kit niut sha ka Hima Sohra ba kan pyndonkam ha kaban lum ïa ki niut bad ban ïaid talasi na ka bynta ban peit ïa ka khuid ka suba jong ka thaiñ Sohra.
Kane ka program kaba dei shi bynta jong ka jingplie ïa ka CSR Project na ka bynta ka Hima Sohra, la pynlong hapoh hall Polo Orchid Resort kaba don ha Sohra ha kaba u Bah Mark Andrew Challam, SDO ka Sohra Civil Sub Division u la long kum u Kongsan ha ka jingïadon lang u Acting Chief ka Hima Sohra Mynjurlang Majaw.
Kiwei de kiba la ïadonlang ki kynthup u Kishan Tibrewalla, Chairman ka Hotel Polo Towers Ltd., ka Chandana Das kaba dei ka President jong ka Rotary Club Shillong, Bah Alan West Kharkongor, Adviser Tourism ka Hima Sohra, u bah Marremdor Syiem, ki Myntri bad Bakhraw ka Hima Sohra bad ka kynhun jong ka Hima Sohra Tourist Assistance Team.
Ka jingthmu jong kine ki kynhun ban ai ïa kine ki thuk thuk bad kali kit niut ka long ban ïasnohkti lang ryngkat ka Hima Sohra kaba ïakhun ban pynlong ïa ka Sohra kaba khuid, kaba jyrngam bad kaba shngaiñ, da kaba buh ruh ïa ki briew kiba peit bad khmih na bynta kane ka jingthmu.
Hadien ba la dep ka jingïalang la aiti ïa ki shabi bad ki kot ki sla sha u Acting Chief uba la aiti ha ka kynhun jong ka Hima Sohra Tourist Assistance Team kiba la shimti ïa katei ka kali bad ki thuk thuk ban sdang ïa ka kam ba la bynshet ha ki. Kum ban pynkynmaw hangne, ka Hima Sohra lyngba ka tnad Tourism ka la shim ïa ka sienjam ban ïakhun na ka bynta ka khuid ka suba da kaba ki la ai kyrteng “Green, Clean and Safe Sohra Campaign” ryngkat bun ki jingmaham ban ym pynjaboh ïa ka mariang.