Lum jingïalang ka PIB ha DC ophis bad pynshai ïaka rukom treikam ka skim VB—GRAMG

Jowai, Lber 30 : Ka Press Information Bureau (PIB), Shillong, ha ryngkat ka jingïatreilang ka ophis u Deputy Commissioner bad ka Jaiñtia Journalist Association, mynta ka sngi 30 tarik u Lber kila pynlong ïaka Varta–Media Workshop halor ka Viksit Bharat—Guarantee for Rozgar and Ajeevika Mission (Gramin) (VB—GRAMG) bad kiwei de ki skim na ka sorkar kmie.
Ïa ka jingïalang la pynlong ka DC Office Conference Hall, West Jaiñtia Hills District, Jowai ha ka jingdong lang u Additional Director General, NEZ, u Kripa Shankar Yadav (IIS), ka Additional Deputy Commissioner bad ka Project Director ka DRDA, West Jaiñtia Hills ka kong B. Blah, MCS, u Gopajit Assistant Direct, PIB, Shillong, ki BDO jong ka District, ki ophisar, ki nongthoh khubor, ka Synjuk ki Waheh Shnong Ri Jaiñtia bad ki dkhot ka NRLM kiba la wan ban donlang.
Kane ka Workshop ka long shi bynta ban pynsngewthuh sha ki nongthoh khubor shaphang ki jingthmu ba kongsan jong ka sorkar, halor ka rukom pyntreikam ïa ka skim thymmai kaba la tip kum ka VB- GRAMG bad ïa kane ka skim la bujli bad pynkylla noh na ka MGNREGA bad la pynjlan ïa ka jingtreikam na ka 100 sngi sha ka 125 sngi.
Na ka liang u Gopajit Das, Assistant Direct, PIB, Shillong haba ai jingkren ula pdiang sngewbha ïa baroh kiba wan ban donlang, ula pyntip ba ka sorkar India kala rai ban pyntreikam ïa kane ka skim ïa kaba la ai kyrteng thymmai ka Viksit Bharat—Guarantee for Rozgar and Ajeevika Mission (Gramin) (VB—GRAMG) khnang ba ki paidbah ki sngewthuh shai halor ka rukom treikam jong ka.
Katba u Kripa Shankar Yadav ula pynsngew ïaka thong jong u Myntri Rangbahduh ka ri ha u snem 2027 ba ka ri India kala long ka ri kaba kiew shaphrang ha baroh ki liang. Ula ban jur ban pynurlong ïa kane donkam ka jingïashim bynta ki nongshong shnong na ki thaiñ nongkyndong khnang ban kyntiew ïa ka ïoh ka kot.
Ula pynpaw ba ki prokram kum ka VB- GRAMG ki don ka bynta kaba kongsan ha kaba pynkhlaiñ ïa ka jingim nongkyndong bad ban pynmih ïa ki lad kamai kajih. U ong ka bynta jong ki lad pathai khubor ka long kaba donkam ban pynphriang ïa ki jingtip sha ki paidbah bad ki long kum ki nongpynïasoh ba kongsan hapdeng ka sorkar bad ki paidbah.
U la kyrpad ïa ki lad pathai khubor ba kin ai ka jingkyrshan ïa ka sorkar ban pynsaphriang ïa ki prokram bad ki jingthmu jong kane ka skim pynroi, khnang ba ki nongshong shnong kin ïoh jingmyntoi.
Katba ka kong B. Blah, kala pyntip ba ka MGNREGA kala long ka prokram kaba donkam bha haka District kumjuh ha ka jylla, ha kaba bun ki longïing nongkyndong ki shañiah na kane ban ïoh kam ïoh jam bad ka kamai kajih. Kala kyntu ïa ki nongïoh jingmyntoi bad ki paidbah ba kin sngewthuh ïa ka jingïapher hapdeng ka skhim kaba rim bad kaba thymmai.
Shi bynta na kane ka prokram yn leit pynsngewthuh sha ki Block bad ki shnong bapher bapher. Kala bynrap ba haka por ba pynkylla na ki skhim barim sha ka skhim thymmai, bunsien ka don ka jingtieng bad jingsngewthuh bakla hapdeng ki paidbah, kumta ka donkam ka jingïasngewthuh lang ban ai pyntip kaba shai sha ki paidbah lyngba ki lad pathai khubor.
La pyntip kane ka skim treikam jong ka VB- GRAMG yn pyntreikam ha ki saw tylli ki bynta ba kongsan, kata ka jingduna um bad ka rukom pynneh pynsah ïaka um, ki jingtei haki jaka nongkyndong, ki jingtei naka bynta ka imlang ka sahlang bad ki jingtei ban ïada ïa ka mariang.
Ha kane ka sngi la pynsngew ruh halor ki skim jong ka sorkar kmie na ka bynta ki nongthoh khubor kala la tip kum Journalist Welfare Scheme bad ki nongthoh khubor kiba dei hok ban ïoh ka long ïa kito kiba la trei palat ïa ka san snem shaneng bad ka lad ban leit (Tour) sha bar ka jylla.