Jam ka EKHCA 5th District T20 CT sha ka semi final; Rung khatduh ka Sohra Combine bad ka Mawphlang CC

By Mawphor Editor On Mar 31, 2026

SHILLONG, Lber 30: Ka Sohra Combine bad ka Mawphlang Cricket Club ki la pynskhem kum ki ar tylli ki kynhun ba khatduh ban buh jaka ïalade ha ka Semi final jong ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association.
Kane la pynthikna hadien ba ki la jop ïa la ki jong ki jingïakhun Quarter final hynne ka sngi Nyngkong, ha kaba ka Sohra Combine ka la jop da 6 wiket ïa ka Laitkynsew MC; nangta ka Mawphlang CC ka la pynliem noh ïa ka Laitjem CC da 4 wiket.
Haba phai sha ka Quarter final ba nyngkong, ka jingïalehkai ba kyrpang jong u Shanborlang Kharshiing ha ka boling, da kaba khur marwei haduh 5/17 naki 3 ober, ka la pynlah ïa ka Sohra Combine ba kan pynkhyllem noh baroh 10 wiket jong ka Laitkynsew MC na ka bynta 141 ron haki 16.5 ober. U Mebanrikupar Malngiang u la noh synñiang 43 ron naki 29 tylli ki bol.
Nangta ka Sohra Combine ka la pyndep ïa ka kamram da kaba hap tang 4 wiket ban kynjoh 144 ron haki 16 ober. La lamkhmat ïa ka tied da u Donkyrmen Nadon (47 ron naki 27 bol), katba u Pynskhem Phawa u la khur 2/31 naki 3 ober.
ïa ka khusnam Player of the Match la ïoh da u Shanborlang Kharshiing, uba la khur marwei haduh 5 wiket ha ka boling.
Ha ka Quarter final kaba bud, ka Mawphlang CC ka la weng noh ïa baroh 10 wiket jong ka Laitjem CC na ka bynta 136 ron haki 18.4 ober. Dei tang u Anthony Kharwar uba la kham seisoh ha ka tied da 22 ron naki 11 bol, katba u Janai u la khur 4/18 naki 4 ober.
Haba jubab, ka Mawphrang CC ka la pynskhem ïa ka jingjop da kaba kamai 137 ron bad khyllem 6 wiket haki 17.5 ober. U Saindorlang Ripnar u la long u nongtied ba kongsan tam, da kaba kamai 76 ron naki 32 bol bad khur syndon ïa ka khusnam Player of the Match.
Baroh ar tylli ki semi final kin long ha ka 01 tarik u ïaïong. Ha ka por 8.30 baje mynstep ka Cricket Smit kan ïakhun pyrshah ïa ka Mawphlang CC, nangta bud sa ka Friends United pyrshah ïa ka Sohra Combine, ha ka por 12.05 baje mynsngi.