Na ki 61 tylli ki shnong ba hap ha ka Rambrai bad Myrïaw 47 tylli ki shnong ki kwah ban lait noh

Nongstoiñ Lber 29: Ki shnong ki thaw baroh kiba don hapoh u pud u sam jong ka ri Khasi Jaiñtia ki don la ki jong ki jong ki nongsynshar la ki dei kiba hap ha ki hima ba la synshar da ki Syiem, Sirdar, Wahadadar, Lyngdoh, bad kiwei kiwei. Haba ha ki shnong ki thaw ha West Khasi hills ki don mynta kumba 61 tylli ki shnong kiba hap ha poh ka jingpeit jingkhmih jong ki tei ki arngut ki Syiem kata ha u Syiem ka hima Rambrai bad u Syiem jong ka Myrïaw.
Ha kine ki khyndiat sngi ba la dep la ïoh ban ïakynduh ïa u bah P.S.Lyngdoh u dkhot ba rim jong ka Excecutive Dorbar jong ka hima Myrïaw.Haba pyrshang ban twad jingmut na utei u rangbah ha kaba ïadei bad ka jinglong jingman jong ki shnong ki thaw kiba hap ha ka jingsynshar ar Syiem u la ong ba kat kum ki jingthoh jingtar kiba don ha ka ophis jong ka hima Myrïaw la ong ba mynshuwa eh ki don tang hynñiew tylli ki shnong kiba Hap ha ka jingshah synshar ha ki ar Syiem bad la tip ïa kitei ki nong shong shnong kum “ki khun hynñiew shnong.
Nalor kata u la ong ba ïa baroh ki jaka ki puta bad ka khyndew ka shyiap kiba hap hapoh u pud u sam jong kitei ki hynñiew shnong la tip kum ka ka joint property. Ha kajuh ka por u la ong ba katba nang slem bad ki snem ki nang tyllun ki shnong ki la nang bun bad haba kheiñlang ïa ki shnong baroh kiba hap ha ka jingpeit jing khmih jong ki ar Syiem ki la don mynta kumba hynriewphew wei tylli.
Utei u rangbah u la ong ruh ba ki sordar jong kitei ki hynriewphew wei tylli ki shnong haba ki la shah jied ki hap ban leit shah pynskhem ha baroh ar ngut ki Syiem kata ha u Syiem Myrïaw bad ha u Syiem Rambrai bad ï ki Sanad ruh hab ban ai da baroh ar ngut ki Syiem
Ha kaba ïadei bad ka jingpynïaid ha ka synshar ka khaddar u bah Lyngdoh uu la ong ruh ba ha ka por ba u dang long kum u dkhot ka Excutive dorbar jong ka hima Myrïaw u la dep pynsngew man ka por ha ka Excutive dorbar ba kitei ki hynriewphew wei tylli ki shnong ki la dei ban hap noh tang hapoh kawei ka hima hynrei ka Executive dorbar kam shym la lah satia ban pyntrei kam ïa katei ka mat.
Nalor kata u la ong ruh ba kum uwei na ki rangbah uba la ïadon bynta ha ki kam hima la bun bun snem u kwah ba lada ki ar Syiem kim sngew mon ïa kata ki dei ban pyllait noh ïa ki sawphewhynñew tylli ki shnong na ki ar Syiem bad kin aiti noh tang ha kawei ka hima khnang ba kan pynsuk ïa ki sordar shnong haba ki leit don kam ha ophis jong u Syiem.
Ha kajuh ka por u la ong ba lada kim lah ban leh kumta ka por ka ladei ba kin pynkha noh la ka jong ka hima kaba thymmai khnang ba kin jied hi ïa ka Headquarter jong ka hima bad ban jied hi ïa u nongsynshar , ban pynïaid noh hi ïa baroh ki kam ha kaba ïadei bad ka synshar ka khaddar.
Shuh shuh u la ong ruh ba halor ka jngbym lah ban pyntrei kam ïa ka mat kaba u la pynsgew u la pyrshang ruh ban twad jingmut na ki sordar bad ki paitbah jong ki hynriewphew wei tylli ki shnong la ki mynjur ne em ban don noh la ka jong ka hima.
Na ki sordar jong hynriew phew wei tylli ki shnong ki don tang khatsaw ngut ki sordar ki bym treh ban mynjur ïa kata katba na ka liang ki paitbah nongshong shnong pat ki kwah bad ki sngewtynnad bha ban don tang ha kawei ka hima lane ban ïoh noh la ka jong ka hima ba thymmai.