Nongstoiñ, Lber 29: Naduh mynshuwa eh ki riew tymmen ki ju ïathuh khana shaphang ka shnong Umyiap ka don shaphang mihngi na Nongstoiñ bad ka dei ka shnong kaba ki paitbah kiba mih na ka hima Maharam, ki leit buhai shnong ha ki bynta ba shaphang shatei bad shaphang jong ka West Khasi Hills ki ïaid lyngba.
Hynrei lada wad ïa katei ka shnong ym lap satia lait noh tang kawei ka shnong Umyiap kaba don shaphang mihngi na ka shnong Langpih kaba dei ruh ka jaka ïa kajia pud bad ka Assam.
Kaba phylla ka long ba lada ïaid ïa ka surok na Nongstoiñ sha Mawkawah, Khliehmawlieh ter ter shaphang mihngi lah ban lap ïa kawei ka ïingmane jong ka Balang Presbyterian Umyiap kaba don ha ka jaka ba ki khot ka Nongrangoi hynrei ïa ka shnong Umyiap pat ym lap satia ka don haei.
Shaphang mihngi na ka shnong Nongrangoi ka don ka pyntha rep kaba itynnad bha kaba la ju khot ka pyntha Umyiap bad ka dei ruh ka pyntha rep kaba heh tam hapoh ka jylla. Hamar pdeng jong katei ka pyntha rep ka don ka madan kaba itynnad bha kaba la khot ka ka madan Riewblei.
Ha ka jingïaid lynti jong u nongthoh khubor lyngba katei ka madan, la lap ba ha tduh jong ka la don uwei u mot bad utei u mot la thoh ïa ka kyrteng jong u Larsingh Khongwir bad ïa ka kyrteng jong ka meirad Lantina Wahlang ka khun nyngkong jong ka meirad (L) Simbon Wahlang kaba la ai sngewbha ïa katei ka jaka.
Ha kaba ïadei bad ka jingtei ïa utei u mot, la ïoh ban ïakynduh ïa ka meirad Lantina Wahlang bad u bah Breston Marbañiang u ba dei ruh u Tymmenbasan jong ka balang Presbyterian Mawïawet u kurim jong katei ka meirad. Haba ïakren bad ka meirad Lantina, ka la ong ba ka jingai sngewbha jong ka ïa katei ka jaka sha ka balang Presbyterian Umyiap ba kan tei ïa utei u mot, ka long kum ka nongmuna ban pynsah jingkynmaw ïa ki khun ki ksiew pateng la pateng ïa ka jingwan ïalap jong u Larsingh Khongwir ha katei ka madan ha ka 27 tarik jong u bnai Risaw jong u snem 1855.
Na ka liang u Tymmenbasan Breston Marbañiang u la ong ba ha katei ka por ba u Larsingh Khongwir u wan ban ïalap ha katei ka madan, baroh ki nongshong shnong ha katei ka thaiñ ki dang bat pyrkhing bha ïa ka niam tynrai bad ki jinghikai jong ka ha ka kñia ka khriam ka suit ka shor bad kiwei kiwei bad ym pat don Khristan wat uwei ruh ha ka thaiñ baroh kawei.
U la ong ruh ba dei hadien ka jingwan ïalap jong u Larsingh Khongwir ba la don uwei u rangbah nongkñia u ba khraw bha u ba la tip kyrteng kum u Domdoi jait Khardewsaw uba dei na ka shnong Nongspung West Khasi Hills u ba la kylla Khristan nyngkong eh.
Nalorkata u la ong ruh ba katkum ka jingïathuh khana jong ki parad ki meirad jong u, ba ka jingkylla Khristan jong u Domdoi ka la pynkhihwin ïa baroh ki shnong ki thaw ha katei ka thaiñ, namar kim shah satia ba uno uno u nongshong shnong un pdiang ïa kiwei pat ki jait niam namar ba ki dei ki niam khyllah.
Utei u tymmen basan u la ong ruh ba katkum ka jingïathuh ki riew tymmen, ba ha kata ka por baroh ki nongsynshar shnong ki la ïakut ban pynlong da ka dorbar bah bad khot hajir ïa u Domdoi Khardewsaw bad ban pynshitom ïa u da kaba kin ym shah shuh ïa baroh ki nongshong shnong ba kin ai bylla ai sngi ïa u Domdoi.
U la ong ruh ba ki kpa tymmen ki la ïathuh ruh ba ha ka por ba ki rangbah shnong ki la hot hajir u Domdoi, u la leit bad ka la don ka jingïatai nia kaba jur bha kat haduh ba ka la poi sha ka jingïa pyni bor.
La ong ruh ba u Domdoi u la ong ïa kita kiba wan ha ka dorbar ba lada kita ki blei ba ki ngeit bad ki ju kñia ju khriam ki dei kiba shisha ki dei ban pyni da ki kam. Ha katei ka jaka ba ki shong dorbar u don uwei u maw u ba heh bha bad bun bah ki maw ba kham rit ba ki ju shong ha ka por long dorbar, ha kaba kita ki rangbah ki la ong ba kin pyni da ka kam da kaba kyrpad ïa ki blei jong ki ba kin pyntyllun noh ïa kitei ki maw na katei ka jaka.
La ong shuh shuh ba kitei ki rangbah ki la kñia ki la khriam ki la shat ki la kheiñ da ki bun bun kynta, hynrei kitei ki maw kim man khih satia uwei ruh. La ong shuh shuh ba haba ki la thait ka shat ka kheiñ ki la ong sa ïa u Domdoi ba un pyrshang ban duwai ha u ta u Blei u ba u la ngeit bad lada u lah ban pyntyllun ïa kitei ki maw baroh kin kylla Khristan bad ki ngeit noh ha ka niam u Domdoi.
Ha kata ka por u Domdoi u la sdang ban duwai bad katba u dang duwai kita ki maw ki la sdang ban khih uwei hadien uwei pat bad khatduh eh uwei u maw u ba heh u la khih buk bad u la tyllun arted sha jrong lum nangta u tyllun shuh shuh sha ka them ba don ki pynthor kba bad kiwei pat ki maw kiba kham rit ki la ïabud lang.
Kita ki rangbah haba ki la iohi ïa kata ka kam phylla ki la lyngngoh bad shuwa ba ki maw kin poi ha pynthor kba, ki la kyrpad ïa u Domdoi ba un pynsangeh namar ki la sheptieng ïoh kin poi sha pynthor kba. Kumta u Domdoi u la pyrta da kaba ong ‘Sangeh’ bad kitei ki maw ki la sangeh tden ha khlieh jong kitei ki pynthor kba.
Utei u Tymmen basan u la pynkut da kaba ong ba ka jingwan ïalap jong u Larsingh Khongwir u ba la thaw ruh ïa ka jingrwai kaba ong “Kin ïalap ï’u Jisu Khrist Halleluia ha dkhar ha Khasi ruh Halleluia. Gospel ka la wan ha ngi Halleluia ruh kan leit haduh sepngi Halleluia”.
Kitei ki kyntien jingrwai ki la long ki symboh ksiar bad symbai kiba bha kiba u Blei u la ai ha u Larsingh ba un wan ban bet ha kane ka pyntha Umyiap bad ka la long shisha ka thymmei jong ka jingroi ki Balang Khristan ha kane ka thaiñ.
