Jowai, Lber 29: U bah Wanbun N Dkhar uba bat ïaka kam General Secretary ka Hynñiewtrep Integrated Territorial Organisation Central Body naduh u snem 2021 ula shim ïaka rai ban shongthait noh naka seng naki daw shimet.
U bah Dkhar u la ong ba ula don haka jylli treimon Sngewbha naduh u snem 2008 haduh kine ki sngi ba mynta bad kala dei ka por ban shongthait noh bad ban pyrkhat da kiwei pat ki lad ki lynti jingshakri ïa u Paidbah, naka liang jong u bah Dkhar ula ai khublei ïaki para nongïalam ka CEC bad ki dkhot kiba ai ïa u ka jingkyrshan bad ai mynsiem haka jingïaid lynti jong u kum u General Secretary ka Seng naduh ba sdang ïaka haduh mynta bad kumjuh ruh ïa baroh ki paradoh parasnam ka bri u Hynñiewtrep kiba shait ai mynsiem ïa u haka jingshakri Paidbah.
Shuh Shuh u bah Dkhar ula ong ba ka jingshakri ïa u Paidbah kam kut tang haki jylli treimon sngewbha hynrei haba ong ka jingshakri ka mut ki don bun ki rynsan ai jingshakri.
Kum u nongïalam uba la rangbah u kloi ban ïarap ïaki Paidbah ha kano kano ka bynta ba ki don kam katkum i bor ba shah, namar u ngeit ïaka jingong ba ka jingshakri ïaki para bynriew kadei ka jingshakri ïa U Blei bad kaba Kongsan kaba ngi dei ban kynmaw ka long ba ngi dei ban don kata ka mynsiem jingsngewnguh kaba burom markylliang bad ka jingïaishah khnang ba ngin lah ban jop haka jingim jong ngi, la pynkut u bah Wanbun N Dkhar ha ka kyrwoh bala phah.
