Shillong, Lber 29 : Ka lympung ïalehkai badminton ba la tip kum ka 1st ALTUS Badminton Prize Money Tournament 2026, kaba la pynlong da ka ALTUS Badminton Academy, ka la kut noh ha kane ka sngi Saitjain ha ka jingïakhun ba ar sngi kaba la pynlong ha Glade’s Sports Arena Mawroh.
Ha kane ka lympung la sakhi ruh ïa ka jingwan shimbynta shitrhem jong ki samla ba dang khie kiba la pynshongshit bad pynshongkun ïa ka jingïalehkai.
Kane ka lympung ka la plie lad naduh kiba hapoh 11 snem, hapoh 13 snem bad ruh ïa kiba hapoh 15 snem. Bad baroh lada khein kyllum ki don haduh 88 tylli ki jingïalehkai kiba la pynlong ha ka Singles bad kumjuh ha ka Doubles. Lah ruh ban ong ba kane ka lympung ka kylla long ka rynsan na ka bynta ki samla ba dang khie ban pyni ïa ka jingtbit jong ki bad kumjuh ïa ka jingkiew ka jingïalehkai badminton ha ka thain.
Ïa kane ka lympung la wan ban pynhap pyrda da u MLA ka Shillong North, Bah Adelbert Nongrum kum u Kongsan bad u MDC ka Jaïaw u Bah Denzil Raynard Chen kum u Symbud Kongsan.
Napdeng kiba bun ki nongïalehkai kiba kynsai la sakhi ruh ïa ki katto katne ki nongïalehkai kiba da don shisha ïa ka jingtbit. Ka Lateisha Nongtraw ka la paw kum kawei na ki lahduh kaba khur takma ha ka Under 13 bad kumjuh ha ka Under 15 ha ka thup Girls Singles. Ki don ruh bun kiwei ki samla ba dang khie kiba la pyni ïa ka jingnang kiew jong ki ha kane ka jait jingïalehkai.
Ki nongjop ha ki thup ïakhun bapher bapher ki long kumne harum – Ha ka Under-11 Girls Singles ïa ka nam lahduh la ïoh da ka Ïan Chettri Kamei bad ïa ka kyrdan ba ar da ka Eviana K Momin.
Ha ka Under-11 Boys Singles ïa ka nam lahduh la ïoh da u Dasan Marbaniang bad ïa ka kyrdan ba ar da u Ethaneal Dkhar.
Ha ka Under-13 Girls Doubles ïa ka nam lahduh la ïoh da ka kynhun jong ka Anosa K Momin / Eviana K Momin bad ïa ka kyrdan ba ar Rohi Barua / Hazel Phanwar.
Ha ka thup Under-13 Boys Doubles ïa ka nam lahduh la ïoh ka kynhun jong u Donato Marak / Arup Baishya bad ïa ka kyrdan ba ar da ka kynhun jong u Meshan Lyndem / Jayden Toi Marbaniang.
Ha ka Under-13 Girls Singles ïa ka nam lahduh la ïoh da ka Lateisha Nongtraw bad ia ka kyrdan ba ar da ka Tezayah B Jyrwa.
Ha ka Under-13 Boys Singles ïa ka nam lahduh la ïoh da u Jayden Toi Marbaniang bad ïa ka kyrdan ba ar da u Abraham.
Ha ka Under-15 Girls Doubles ïa ka nam lahduh la ïoh da ka Haphi Massar / Lateisha bad ïa ka kyrdan ba ar da ka kynhun jong ka Ehma Sangma / Anosa K Momin.
Ha ka Under-15 Boys Doubles pat ïa ka nam lahduh la ïoh da ka kynhun jong u Elmo Marak / Sixbirth Marak bad ïa ka kyrdan ba ar da ka kynhun jong u Haegan Diengdoh / Abraham.
Ha ka liang ka Under-15 Girls Singles ïa ka nam lahduh la ïoh da ka Lateisha Nongtraw bad ïa ka kyrdan ba ar da ka Haphi Massar.
Bad ha ka Under-15 Boys Singles ïa ka nam lahduh la ïoh da u Haegan Diengdoh bad ïa ka kyrdan ba ar da u Sixbirth Marak.
Ïa ka khusnam ba kyrpad pat la ïoh da u Ezariah KD Dhar kum u Most Promising Player ha ka liang ki khynnah shynrang bad ha ka liang ki kynthei pat la ïoh da ka Gianna Warlalpih.
