Kyrpad ka KSU ïa u DC ban bthah ïa ka NHAI ban maramot ïa ka surok NH bad ïa ki jingkieng ha East Jaiñtia Hills

Khliehriat naitung 13: Ka Khasi Students Union East Jaiñtia Hills District, mynta ka sngi ka la leit ban buh da ka jingthoh ha ophis u Deputy Commissioner ka East Jaiñtia Hills District bad pynpaw ka jingsngew khia halor ka jingjulor palat ka surok national highway-6 bad ka jingpynslem ka tnat C.P.W.D ban maramot ïa ki jingkieng kiba la julor kiba doh ha ki thaiñ khappud bad ong ruh ba kane ka jingpynslem ka tnat ka la buh jingeh haduh katta katta ïa ki paidbah ha ka leit ka wan bad ha ka kit ka bah ha ka thaiñ khappud.
Lyngba katei ka shithi ba la soi kyrteng da u President ka KSU-EJHD, u samla S.Suchen bad u General Secretary u samla K.S.Suchiang, ki la kyntu jur ïa u Deputy Commissioner ba un sngewbha ban bthah ïa ka National Highway Authority of India ba kan sdang noh ïa ka jingmaramot ïa ka surok kaba la jot rathai kaba na ka daw ka jinglynshop u slap, ha kaba bun ki bynta jong ka surok ki la twa, ki la jot la pra lut bad buh jingma ïa ki nongleit nongwan.
“Hooid ngi sngewthuh ba ka long kaba eh ban pynbit pynbiang ïa ka surok ha kum kine ki por namar ba ka dang dei ka aiom slap, hynrei watla katta ruh na ka liang ka Khasi Students Union East Jaiñtia Hills District ka buh ïa ka jingkyntu ba kham pynkloi noh ban sdang ban maramot ïa ka surok bad kumjuh ruh ïa u Chief Engineer jong ka tnat C.P.W.D ban shna pynbha noh kloi ïa ki ar tylli ki jingkieng kiba la shah pynjulor ha ki bor ka mariang khnang ba ki nongshong shnong ha khappud kin nym kynduh jingeh than, kumjuh ruh kum ka seng ngi kyntu ïa ka NHAI ba kan shim khia ban ai ïa ka jingshakri kaba paka ïa ki paidbah jong ka district bad kumjuh ruh ban kham pynsuk ïa ki nongleit nongwan kiba na kiwei kiwei ki jylla ruh kiba ju iaid lyngba na kane ka surok NH-6” pynpaw ka seng.
Ka seng ka ban jur ïa ki bor synshar district ruh ba ba kin shimkhia ban bthah bad ban pynkynmaw bad ban kyntu jur ïa ka NHAI bad ïa ka tnat CPWD ba kin pynkloi ïa ka kam.
Na ka liang kiti ki nongialam jong ka KSU-EJHD, ki la iathuh ba na ka liang u ADC ka East Jaiñtia Hills District, u bah S.S.Syiemlieh, haba ïa kren bad ki nongïalam, ki dkhot ka seng, u la kubur ba ka long kaba shisha ba ka surok NH-6 ka la sniew shaba palat bad u la kular ruh ban pynpoi noh kloi ïa kane ka shithi kaba wan na ka seng, ban forward ne phah noh kloi sha ka NHAI bad ha kaba ïadei bad ki ar tylli ki jingkieng kawei ha Shymplong (RCC Bridge 54/1) bad ka jingkieng ha Shnong Lahaleiñ kiba don ha u surok khappud Sonapyrdi sha Borghat East Jaiñtia Hills kiba la shah pynjulor ha ka um namar ka jingjur slap, u ADC u la ïathuh ba na ka liang ka ophis u Deputy Commissioner ka la dep ban ai jingthoh sha u Chief Engineer jong ka tnat C.P.W.D, Shillong, hynrei haduh mynta ym pat ioh jubab eiei na katei ka tnat.
Na ka liang ka seng ka byrngem ruh ba lada dang pynslem ban sdang ïa ka jingmaramot ïa ki surok bad ïa ki jingkieng, ka seng kam banse ban iaid noh da kawei ka lynti kaba kham tyngeh, namar ka seng kam lah ban shu sngap bad ban shu peit ïa ki jingeh ba ki paidbah ki ïakynduh ha ka leit ka wan kaba la buh jingeh ïa ki paidbah khamtam ha ka kit ka bah bad ha ka pang ka shitom .