Namar ka jingtei ker ïa ka footpath ha G.S.Road Police Bazaar hap ïaid ki paidbah na surok kali

Shillong, Lber 02: Kan long ka jingeh shisha ïa ki paidbah watla don ki lynti ïaid kjat, hynrei kin don ki jingeh kiba ki hap ban mad na ka daw jong ka jingshah tam pud jong ki jingtei kiba don ha Nongbah Shillong.
Ha kaba ïadei bad kane na ka liang jong u nongthoh khubor haba ïoh ban jurip ïa kawei na ki lynti ïaid kjat kaba don ha ka thaiñ Khyndailad Shillong la ïohi ba ki don ki jingtei kiba la ktah shisha ïa ka lynti ïaid kjat jong ki paidbah.
Halor kane la ïohi ruh ba ki paidbah kin hap ban iaid na ka surok kali, ha ka jaka ba kin ïaid na ka lynti ïaid kjat ba la dep pynkhreh.
Kan long ruh kaba lyngngoh ba ki bor pynïaid jong ka sorkar ruh kim ïohi ba kum kane ka jingtei kan ktah kylla ïa ka ïaid ka ïeng jong ki paidbah kaba long ruh ka jingma ïa ki naba kin hap ban ïaid na ka surok kali.
Ïa kane ka jingtei ban khang syndon ïa ka lynti ïaid jong ki paidbah ym lah satia ban tip kumno la ïoh jingbit haduh ban da khang syndon ïa ka lynti ïaid kjat ki paidbah manla ka Sngi.
Lah ruh ban ong ba kane ka jingtei ka la ktah shibun ïa ki paidbah kiba ïaid ba ïeng na kane ka surok manla ka sngi bad na ka liang jong ki bor ba halor kidei ban shim khia ïa kane ka jingeh ba la mad da ki paidbah manla ka sngi.