Sngewkhia u Waheh Shnong ka Pynurkba halor ka jingkren u Bah Ardent ïa ka Reservation Policy

Khliehriat Lber 02 : U Waheh Shnong jong ka shnong Pynurkba, u bah Syrdeplang Ryngkhlem u la pynpaw ka jingsngew khia bad sngew diaw halor ka jingkren jong u President ka VPP u bah Ardent.M.Basaiawmoit haba u kren halor ka State Reservation Policy, kaba thmu bad kdew ba ha ka Reservation Polici dei ban thoh tang ki “KHASI” bad pyndam noh shi syndon ïa ka “JAIÑTIA”, u la ong ba kane ka dei ka jingkren khlem pyrkhat, khlem jingkitkhlieh jong utei u nongmihkhmat uba dei u MLA na Nongkrem.
U Bah Syrdeplang Ryngkhlem u la ong ba “Phim lah ban pynjah ïa ngi na ka RP bad nga ai ka jingkyrshan kaba pura ïa u symbud Myntri Rangbah ba donburom, u bah Sniawbhalang Dhar, uba la shlur ban kyntait mardor ïa ka jingkren laplah jong u MLA Ardent Basaiawmoit, da kaba pynskhem ïa kaei kaba man la ki Jaiñtia ki la tip lypa, ba ka jingkynthoh kaba dei bad tang kawei kaba lah ban pdiang ha baroh ki mat jong ka Reservation Policy bad ka jingsynshar jong kane ka jylla ka dei ka “KHASI- JAIÑTIA” ym ka jingkwah shimet jong u bah Ardent”
“Hato mano ba ai bor ban pynjah ïa ngi ki Paidbah Jaiñtia kiba bun paid, ki Pnar, kiba long ki khun ki ksiew jong ka “Ynñiawtrep, Ynñiawwasa”, ngim dei ki sub-klaus, ngim dei tang ka jingpyrkhat hadien ban kynmaw tang haba donkam ïa ki vote bad klet noh haba thoh ïa ki policy. MLA Ardent Miller Basaiawmoit, hangno la pynbna paidbah bad katkum ka aiñ kaba kumno ba ïa kane ka jaitbynriew dei ban khot tang kum ki ‘Khasi’ bad iehnoh ïa ka kyntien Jaiñtia? Ka Riti Synshar jong ka Ri India, hapoh ka thup Scheduled Tribes na ka bynta ka Meghalaya ruh ka ithuh ïa ka “Khasi” bad “Jaiñtia” kum ki jaidbynriew riewlum ba kyrpang. Kane kam dei ka jingmut jong ngi kane ka dei ka “aiñ jong ka ri”. Na ka bynta u MLA uba la shim ba u dei u nongmihkhmat jong ki paidbah, ban ieng ha khmat ki paidbah bad ban pynpra ïa ka jaitbynriew kiba iapher katkum ka riti synshar sha kawei, kam dei tang ka jingbymtip hynrei ka dei ka jingpynkheiñ ïa ka riti synshar pyrshah ïa ki paidbah Jaiñtia.”ong u Waheh Shnong Pynurkba.
“Ka history hi kan nym sngap jar, ko bah Ardent , ka History kam shym la pyndam noh ïa ngi, ka Riti Synshar kam shym la pyndam noh ïa ngi, ka sorkar India kam shym la pyndam noh ïa ngi, Kumta phi dei uei? Ba phi kren kumba ka Jaiñtia kam don, to ngan pynkynmaw ïa phi ïa ka history ka ri Jaintia, ka “Hima Jaiñtia” ka dei kawei na ki hima kaba la rim bha, kaba donbor, bad kaba la buh jingthoh ha ka histori jong ka thain shatei lam mingngi (Northeast India). La seng ïa ka naduh ka snem “600 H. K.”, ka long ka hima kaba synshar hi, kaba laitluid kaba la pyniar naduh ki lum Jaiñtia sha shiliang ki madan haduh ka wah Surma, shaduh Sylhet sha ri Bangladesh, ka hima kaba heh bad kaba donbor haduh katta katta. Ka Hima Jaiñtia ka la mih lyngba ka jingpyniasoh lang ïa ka “Hima Jayanti” jong ki madan ka hima kaba la rim bha la khot ïa ka kum ka “Hima Sutnga” jong ki riewlum, ki nongsynshar jong kane ka hima ki dei ki PNAR bad ha ka por ba la seng ïa ka Jylla Meghalaya ha u snem 1972, ka sorkar India ka la ithuh ïa ka jinglong kyrpang jong ngi da kaba seng ia ka Jaiñtia Hills District bad ka JHADC, ka jingithuh bad ngi don ka kyrteng jong ngi ki Jaiñtia ha ka map”
U bah Ardent Basaiawmoit u la kren ruh shaphang ka jingkwah ban “pyniatylli” ïa ka jaitbynriew jong ngi phi dei bad tip ba ngi ki Khasi bad ki Jaiñtia ngi long iatylli bad ngi la ju long kawei ka jaitbynriew hapoh ka jingteh ba kyntang jong u “HYNÑIEWTREP”.
U bah Syrdeplang Ryngkhlem u la kynthoh jur ruh da kaba ong ba u bah Ardent um dei ban ïa ka Jaintia tang kum ka jingiohnong politik bad um dei ban pyndonkam ïa ka kyntien jaitbynriew tang na ka bynta ka jingmyntoi politik.
Ha kaba iadei bad kane ka bynta ba kren u bah Ardent Basaiawmoit uba khlem pynmih ia ka kyrteng Jaiñtia ha ka mat ba iadei bad ka State Reservation Polisi u bah Syrdeplang Ryngkhlem u ai ka jingkyrshan ba pura ïa ka Jaiñtia National Council ba la lam khmat da u President u bah Sambormi Lyngdoh bad ka Jaiñtia Students Union kiba la pynpaw ka jingpyrshah jur halor ka jingkrem utei u MLA ha ka ïing Dorbar thaw aiñ.