Nongstoiñ, Lber 01: U sying u dei u mar rep uba ki paitbah nongrep ki ïabeh bha ban rep hynrei la kumba lai snem tam ka ïew ka hat jong utei u mar rep ka la hiar shaba palat kat haduh ba ki paitbah nongrep ki la ïakynduh shibun ki jingeh.
Dang ha kine ki khyndait sngi ba la dep ha ka jingleit peit jong u nongthoh khubor jong u Mawphor ïa ka thaiñ Langpih la ïoh ban ïa kren bad ki ba bun ki nongrep ha katei ka thaiñ.
Haba pyrshang ban twad jingmut halor ka jing long jingman jong ka rep ka riang ha kitei ki thaiñ ki la ong ba ki jaka ha katei ka thaiñ ki long kiba sei soh bha bad kumba 98 % na ki paitbah nong shong shnong ki dei kiba im da ka rep ka riang.
Haba kylli pat ba ki ei ki jait mar rep kiba kham kongsan bad kiba kham ai jingmyntoi ha kaba kyrshan ïa ki long ïng long sem jong ki nongshong shnong.
Kitei ki nongrep ki la ïathuh ba ki don shibun ki mar rep kiba ki paitbah ki ïabeh bha kum u kba u ,Sying,u synsar, kwai, tympew, phan dieng, ka kait, soh ñiamtra bad kiwei kiwei.
Ki la ong ruh ba ha ki snem ba mynshuwa ki mar rep ba kham kongsan ki dei u soh ñiamtra,u kba, phandieng bad riew hadem hynrei u sying, synsar, kwai, tympew bad kiwei kiwei ki dei ki mar rep ba ki paitbah ki dang sdang ban rep dang tang kumba shiphew ne khatsan snem ei ei.
Kila ïathuh ruh ba ha kumba katto katne snem mynshuwa u sying u dei u mar rep ba ki ïa beh bha namar ka dor ïew ka heh bha nalor kata ynda ki la dept hung tang hadien lai ne saw bnai ïa u sying symbai ba ki la thung ki hap ban khlong noh bad die biang hynrei uba sah u dei uba dang shu sdang ban met bad ha u bnai Nohprah haduh Kyllalyngkot ki sa khlong biang.
Kitei ki nongrep ki la ïathuh ruh ba ha ki ar bad lai snem ba la dep ki don ki por ba u sying u la hiar dor haduh san tyngka shi kilo.Nalor kata haba rep sying ka wan sa ka jingïap khlam kat haduh ba ki nongrep ki la shem jingeh haduh katta katta ban ïada na kateio ka khlam.
Ha kajuh ka por ki la ong ba wat la katta ruh ki nongrep ki dang ïabteng ban rep sying bad suki suki ka dor ka la sdang ban kiew bad ha kine ki sngi ka dor jong u sying uba bha ka la kiew sha ka sanphew tyngka shi kilo katba uba kham rit bad u bym dab ha pat ka la kiew sha ka sawphewsan tyngka shi kilo.
Wat la katta ruh kitei ki nongrep ki la ong ba wat la ka dor jong u sying ka la sdang ban kiew ruh kim, pat sngew thikna namar teng teng ka dor ka hiar teng teng ka kiew hynrei jin lada ka dor ka murk an neh kumba ka long ha kine ki sngi ka la long ka jingkyrkhu kaba khraw ïa ki paitbah nongrep.
Nalor u sying ki nongrep ki la ïathuh ba u synsar u dei uwei na ki mar rep ba ki paitbah ka thaiñ ki ïabeh bha hynrei ha usnem ba la dep ka ïew synsar kam don satia bad bun ki nongrep ki la sdang ban kynran dien.
Haba kylli pat ba ha une u snem katno ki nongkhaï ki wan ban thied ïa u synsar na katei ka thaiñ ki la ong ba haduh mynta kim pat lah ban ong namar bay m pat don ki nongkhaï kiba wan thied synsar hynrei ki don ki ba ïathuh ba na ïew Langpih te ha kine ki khyndiat sngi ki nongkhaï ki tied ha ka dor sawphew tyngka shi kilo.
Haba kylli pat ha kaba ïadei bad kiwei pat ki jait mar rep ba ki ju rep ha katei ka thaiñ ki la ong ba kiwei pat ki mar rep kum u kwai, tympew bad ki dieng soh ki dei ki mar rep ba ki la ïabeh bha ha kine ki sngi bad na kitei ki mar rep u kwai u dei u mar rep uba ai jingmyntoi bha namar shi sien ba la thung u im bad neh da ki spah snem .Ki la ong ruh ba lada kheiñ naduh ka por ba thung ka haduh ban un da soh shim por kumba hynriew haduh hynñiew snem.
Kiwei pat ki jingthung ba ki rep kum ki dieng soh ki dei kiba ai jingmyntoi haduh katta katta hynrei ki shem jingeh pat ban sumar namar ka jingbam khñiang bad ka jingïap tram.
Kumta na ka bynta ban kyntiew ïa ka rep ka riang ki la kyntu ïa ki bor sorkar ban bthah ïa ka tnad ka rep ka riang ba kan phai kmat lem sha ki nongrep jong katei ka thaiñ bad ban thaw ki lad jingïarap ban ïada ïa u sying na ka jingïapkhlam.
