Haduh 11 tylli ki K9 ban thwet tiar pynbthei, kham bun dei ban sma dien ïa u drok : DGP

Shillong, Lber 01 : Ka tnad Pulit jong ka jylla mynta ka la don haduh 11 tylli ki ksew K9 kiba la pyntbit kyrpang na ka bynta ban thwet bad sma dien ïa ki tiar pynbthei, ong ka Director General of Police ka Jylla, Kong I Nongrang.
“Kumba long ngi don bun bha ki K9 bad tang na ka bynta ban buddien ïa ki tiar pynbthei ngi don haduh 11 tylli ki ksew ba la pyntbit kyrpang nalor ba ngi don bun tylli ruh kiba la pyntbit ban sma dien ban thwet ha ki kam drok namar ngi la ïoh ruh katto katne na ka DREAM,” ong ka DGP haba kren bad ki lad pathai khubor ha kane ka sngi Saitjain hadien ka jingïalang pdiang burom bad ruh ka jingpynkup burom ïa ki ksew K9 kaba long ha 1st MLP Battalion, Mawiong.
Nangta ka la ïathuh ruh ba mynshwa ki don ïa ka K9 unit ang ha Shillong hynrei mynta ki la buh ha kylleng ki bynta jong ka Jylla kumta kane kan ïarap ruh kham kloi ban ïoh ïa ka jingshakri jong ki.
Katkum ka jingïathuh jong ka DGP la ong ba ki kham jied ïa ki ksew Belgian Malinois namar ki shem ba ki ïahap bha bad ka jinglong jingman ki riat bad ki khohruh khohram ha ka jylla.
“Ho-oid ki Labrabor ruh ki biang bha hynrei ki Belgian Malinois pat ki kham im slem bad lada ïa nujor ïa ki bad ki German Shepherd phi lah ban tip ba ki German Shepherd ki jied beit tang uwei u nongsynran (handler) bad kumta ka kham eh bha lada uto u briew um don hangto. Katba ki Belgian Malinois pat ki lah ban pynïadei kumno kumno ruh,” la bynrap biang ka hehduh jong ki pulit ka jylla.
La ïathuh ruh kumba long mynta, ki don lai ngut ki nongsynran na ka bynta ar tylli ki ksew bad kumta ka kham suk ïa ki haba uto u briew uba dei peit um don ha kano kano ka por.
Haba ïathuh bniah pat halor ka jingpyntbit bad ki K9, ka DGP ka la ong ba kine ki nongsynran ne ki nongpeit ïa ki ksew ki hap ban leit shaduh Bangalore ban shah hikai lang bad ki ksew. Ka la ïathuh ba mynta kine ki dang don tang kumba shi bnai ei ei ha ka jylla bad ka jingïadei jong ki ka la sdang ban nangjan nang jan.
“Naduh Bangalore ki kwan da ka kali bad kumta wat ha bos ruh kine ki nongpeit ki shonglang marjan bad ki K9 kumta ka jingïadei hapdeng jong ki kam dei tang ha ka por ba ki wan pynïasoh sha ka kam hynrei u nongpeit u hap ban don ryngkat ryngkat naduh ban ai bam, sumar bad ha ki liang baroh,” ka la ïathuh.
“Bad wat haba ki pang ruh dei u nongpeit uba pyntip bad ngi shim ïa ki lad ki lynti ban ai jingïarap.”
Haba ïathuh pat ïa ka jingshakri ba kine ki K9 ki ai, ka DGP ka ïathuh ba kine ki lah ban shakri haduh 10-12 snem ei ei hynrei ka shong pat ha ki rukom rukom namar ka rta jong ki ka dei 15-18 snem.
Ka la ïathuh ruh ba mynta man ki unit ba ki don la ka long ha Baghmara, Tura ne Williamnagar ki don lut ïa baroh ki jait K9, naduh kiba la pyntbit ban buddien ïa ki tiar pynbthei, nangta ban sma dien ïa u drok bad kiwei kiwei.
Kane ka hehduh ki pulit ka la ïathuh ruh ba mynta ba ki lai tylli ki ksew kiba la shongthait ha kane ka sngi Saitjain ki kynthup ïa uwei u ksew Belgium Melanois uba dei u ksew sma dien bad ar tylli pat ki dei ki Labrador kynthup ïa uwei uba sma dien ïa ki tiar pynbthei bad uwei pat ban sma dien ïa u drok.
Lah ban kdew hangne ba na ka liang u Symbud Myntri Rangbah ka Jylla Bah Prestone Tynsong u la ïaroh ïa ki K9 Unit ka jylla kiba long kum u païa uba khlain na ka bynta ban wallam ïa ka shongsuk shongshngain ha ka jylla.
Katkum ka jingïathuh jong u ha ka jingïalang kaba long ha Mawiong ha ka sngi Saitjain la ong ba ka tnad mynta ka don haduh 37 tylli ki K9 ba kynthup haduh 10 tylli kiban buddien ïa ki nongleh kam sniew, 14 tylli kiban pyndonkam ha kaban lap ïa ka jingbuhrieh ïa ki drok, 11 tylli kiban wad ïa ki tiar pynbthei bad ar tylli ki ksew kiba la pyntbit kyrpang ban ïakhun ïa ki riewsniew.