Nongstoiñ, Rymphang 27: Ka jingkren tohmet bad kren poh jong u Sunil Deodar ïa ka jaitbynriew Khasi Pnar ha kine ki khyndait sngi ba la dep kaba la saphriang sted bha ha ki rynsan social media, facebook page bad inmstagram ka la pybitar lep ïa ka jaitbynriew Khasi pnar baroh kawei.Kumta halor katei ka jingkren jong u ki nongïalam jong ka Catholic Associtiation Nongstoiñ Dioceces hadien ba ki la ïa shong pyrkhat bad bishar bniah ïa ka jingkren jong u lyngba ki video clip ki la mih shakhmat ban pynrem jur bad bad dawa panmap na utei u briew.
Kitei ki nongïalam ka CAND haba ïakren bad ki lad pathaikhubor ha ka janmiet jong ka sngi thohdieng ka 27 tarik Rymphang ki la pynpaw ïa ka jingsngewkhia bad ki la ong ba na ka liang jong ka Association ka pynrem jur bad dawa ba u dei ban panmap bad pyndam noh ïa kato ka video namar ba katei ka jingkren jong u ka long pyrshah ïa ka jaitbynriew Khasi Pnar. Ki la ong ruh ba ha ka ri Khasi jaiñtia bad ha ka jylla Meghalaya baroh kawei ki don da ki spah tylli ki jait niam naduh hyndai hynthai hynrei kim ju don ka jingsngew ïapher ha ka imlang sahlang hynrei ki ïalong kawei bad ki ïatylli ha baroh ki liang.
Nalor kata ki la ong ruh ba ka jingkynnoh jong utei u dkhar ba ha Meghalaya la ai ïa ki kam pynroi tang lada ki kylla niam ka dei ka jingkynnoh khleh biej bad ka bym don nongrim haei haei ruh namar ki kam pynroi kiba don ha ka jylla ki dei na ka bynta jong baroh.
Ha kaba ïadei bad ka jingkynnoh ïa ki khynnah skul ba lada ki pass ïa ki kot pule niam kum ka Bible bad ki pheil ïa kiwei pat ki sobjek ki nonghikai ki pyn pass beit u bah Nerïus Syiemlieh u la ong ba katei ka jingkren ka la pynmong haduh katta katta ïa baroh ki balang Khistan namar ba kam ju don kum kata hangno hangno ruh.
U Babu Witting Mawsor pat u la ong ba ka jingkren jong utei u dkhar ka pynklumar jingmut ïa ki khynnah bad ka pynsniew haduh katta katta ïa ka lawei jong ki khamtam ïa ki khynnah skul.
U la ong ruh ba ka jingkren jong u ka long pyrshah ruh ïa ka riti synshar jong ka ri namar ka riti synshar ka kdew ba baroh ki paitbah nongshong shnong ha ka ri India ki don ïa ka hok ban mane laitluid kam pher wat la ki don ha kano kano ka jait niam ruh. U Bah Julius Nongdhar u la ong ba na ka liang jong ka CAND ka dawa ba utei u dkhar u dei ban panmap mardor halor katei ka jingkren lap lah jong u bad u la kyntu ruh ïa ki bor ka aiñ ba ki dei ban pynshitom ïa utei u briew kat kum ki kyndon jong ka aiñ.
