Jowai, Rymphang 26: Ka Jowai Co-operative Urban Bank Ltd mynta ka sngi Palei kala pynhap pyrda ïaka jingrakhe ‘Jubilee Ksiar’ ne ka jingdap 50 snem (1976-2026) ka jingshakri jong ka sha ki paidbah nongshong shnong haka jingïalang ba la pynlong ha District Library Auditorium Mynthong, Jowai.
Ïa kane ka jingrakhe ‘Jubilee Ksiar’ la leh ha baroh shisnem lynter da ki prokram bapher bapher bad ki lad jingsynñiang kiba ka Bank kaba dei ban aiti sha kiba bun ki kynhuh na ka bynta ban kyntiew ïa ka roi ka por hapoh ka Ri-Lum Jaiñtia.
Ha kane ka sngi pynkut u CEM ka Jaiñtia Hills Autonomous District Council, Jowai ma Thombor Shiwat ula long kum u kongsan, haka jingdonlang u symbud kongsan u EM JHADC ma Moonlight Pariat, ki nongkynshew pisa hapoh katei ka Bank, ki riewrangbah, ki longkmie, ki nongtrei jong ka Bank bad kiwei de ki nongshah khot sngewbha.
U ma B. Pyrngap Assistant General Manager ula ïathuh baka Bank kala pyrshang ban ai ka jingshakri kaba bha tam sha ki paidbah bad kaba pynsuk ïa ki katkum ki kyndon jong ka RBI, ula ong ka pisa kaba la Deposit kaba poi sha ka 200 klur tam, kumta ula ai khublei ïa ki Consumer jong ka Bank ba kin dang ïai kyrshan shuh shuh ban pynkiew ïa Bank ha baroh ki liang.
Haka jingïaid lynti jong ka Bank kala sdang ïa ka rukom treikam katkum ka juk stad (technology) kaba ïa rynkat kyrdan bad kiwei de ki Bank ba heh kiba don hapoh ka Ri.
La pynsngew da u Vice Chairman la seng ïa kane ka Bank da ki nongïalam saiñ hima sima jong ka District Council, hapoh ka jingïalam u CEM ba rim (L) ma JD Pohrmen bad ka jingdon jong kane ka Bank kala long ka jingkyrkhu kaba khraw eh ïa ki nongshong shnong naduh kiba rit haduh kiba heh.
U kongsan ma Thombor Shiwat haka jingkren ula ai ka jingïaroh kyrpang ïa ka Jowai Co-operative Urban Bank Ltd kala la bteng ban ai ka jingshakri sha ki paidbah kaba la kynjop sha u marmer ba 50 snem bad u kitbok ba kan dang ïaibteng shuh shuh ha ki sngi ban wan.
Ula ong kam long kaba suk ïa ka Bank ban ïaid lynti ha ka jingshakri ban ïoh ïaka jingshañiah na ki Customer namar kine baroh dei da ka jingtrei shitom jong ki nongtrei ka Bank kiba don ka jingkitkhlieh ïa ki paidbah.
Katba u ma Moonlight Pariat ula kymtu ban don ka jingtrei shitom ban pynïoh shuh shuh ïa ki Customer kiba dei ki nongthep pisa bad kiba long ruh ki nongkyrshan bor bah ïaka Bank hi baroh kawei.
Ha kane ka sngi la pyllait paidbah ruh ïa ka Souvenir, ka jingot ïa u Cake da u kongsan bad ka jingkhang pyrda ïa u mawnongrim jong ka jingdap 50 snem ka Bank, la pynphuh shuh shuh ïa ka jingïalang da ki jingrwai bad ki jingshad tynrai. Katba ïa ki kyntien ai khublei la ïoh na u A.H. Lytan, In-charge CEO.
