Lap ka jingtohkit ba biang bha ka rukom ai jingsumar kyrkieh ki nongtrei ka CHC Mawïong ïa u MP

Shillong, Rymphang 24: U Myntri ka Koit ka Khiah u Ma Wailadmiki Shylla ula ai jingtip halor ka jinglap jong ka jingtohkit ha kaba ïadei bad ka jingiap u MP ka Shillong Dr Ricky AJ Syngkon, da kaba u la ong ki Nongtrei ka Mawiong CHC ki la shimkhia bad pynsted bha ban ai jingsumar kyrkieh kat kum ka jinglah jong ki shwa ba kin phah pynkit ïa u MP sha ki jaka ai jingsumar kiba heh bad biang ki tiar ki tar.
U Ma Wailad ula ong ba ka jingtohkit, kaba la pynlong da u District Medical & Health Officer, East Khasi Hills, ka la pynshisha ba ki Nongtrei ka CHC ki la pyndep ïa ka emergency assessment ne ne ai jingsumar kyrkieh kat kum ba dei ban ai da kaba pyndait ruh ïa ki kor ki bor life support mar syn poi u Dr Ricky ha CHC ha ka 19 tarik Rymphang 2026, hadien ba u kyllon ha madan ïalehkai phutbol. Kumta kam shym la don ka jingpynsuki, kyntait ban ai jingsumar ne jingbym shim khia ban ai jingsumar.
“Ki nongtrei kiba don ki la leh ïa ki kam hapoh u pud bad jinglah treikam jong ki Community Health Centre, kynthup ka jing eksamin mardor, ai oxygen, leh ïa ka CPR bad phah rah hapoh ka por ba biang sha ki jaka sumar ba kham heh” ong u Ma Wailad
ïa u Dr Ricky la phah pynkit ruh mar mar sha Dr H Gordon Robert Hospital, ha kaba la pynbna iap hadien katto katne por. Ka Tnad ka koit ka khiah ka pynpaw ïa ka jingsngewlem sha kiba haïing hasem u Dr Ricky.
U Ma Shylla ula pynshai ruh halor ka jingkynnoh ba ym don doktor ha Mawiong CHC ha ka por ba rah ïa u Dr Ricky ha katei ka jaka sumar, da kaba kdew ïa ka jingduna ki doktor hapoh ka Jylla.
“Ngi don hapdeng ka jingduna doktor kaba khraw ha Jylla jong ngi” ong u Ma Wailad haba batai ba naki saw ngut ki doktor ba buh ha Mawiong CHC, arngut ki shim shuti ban leit pule postgraduate bad uwei la pynkynriah sha Khliehriat CHC, kaba ieh satang uwei u doktor ban khmih.
U Myntri ula ong ba une u doktor marwei u dei uba lah ban ïakren lyngba ka phone bad nang batai ïa ki nos katba ki dang ai jingsumar ha emergency.
“U don hangtei baroh shisngi naduh 9 baje mynstep haduh 4 baje janmiet ban khmih ïa ki nongpang ha OPD,ki Nos ki la ïakren ïa u doktor lyngba ka phone ba un batai lem ha ka por ba sumar ïa u Dr Ricky” ong u ma Wailad.